სომხეთის ოპოზიციური ფრაქცია ნიკოლ ფაშინიანის იმპიჩმენტის პროცედურის დასაწყებად მზადყოფნას გამოთქვამს
სომხეთის პარლამენტში სიდიდით მეორე ოპოზიციური ფრაქცია „მაქვს პატივი“ მზადაა, ქვეყნის პრემიერ-მინისტრ ნიკოლ ფაშინიანისადმი უნდობლობის გამოცხადების პროცესი დაიწყოს, - „სპუტნიკ-არმენიას“ ცნობით, ამის შესახებ ფრაქციის ხელმძღვანელმა, ჰაიკ მამიჯანიანმა განაცხადა.
„ვადასტურებთ, რომ ამ ეტაპზე ხელისუფლების შეცვლის მიღწევის ყველაზე შესაძლო გზა პრემიერ-მინისტრისთვის უნდობლობის გამოცხადების პროცესია. იმისათვის, რომ ეს პროცესი ზედმეტი პოლიტიკური ამბიციებით არ გავართულოთ, ვაცხადებთ, რომ ამ ეტაპზე პრემიერ-მინისტრის კანდიდატი არ გვყავს. გამოვთქვამთ მზადყოფნას, ყოველგვარი წინაპირობების გარეშე განვიხილოთ კანდიდატის საკითხი და დავიწყოთ პრემიერ-მინისტრისთვის უნდობლობის გამოცხადების პროცესი“, - განაცხადა მამიჯანიანმა.
მისი თქმით, თუ ოპოზიციური ფრაქცია, „სომხეთი“ პრემიერ-მინისტრის პოსტზე ყოფილი პრეზიდენტის, რობერტ ქოჩარიანის კანდიდატურას წარადგენს, ისინი მას მხარს დაუჭერენ.
პარლამენტის წევრებს იმპიჩმენტის პროცესის დაწყების წინადადებით ოპოზიციონერმა პოლიტიკოსებმა: ნარეკ მალიანმა და ედგარ კაზარიანმა მიმართეს.
„სპუტნიკ-არმენიას“ განმარტებით, პროცესის დასაწყებად, ინიციატორებმა პრემიერ-მინისტრის პოსტზე საკუთარი კანდიდატი უნდა წარადგინონ. მთავრობის მეთაურისთვის უნდობლობის გამოსაცხადებლად, იმპიჩმენტს მხარი 107 დეპუტატიდან სულ მცირე 54-მა უნდა დაუჭიროს. ოპოზიციურ ფრაქციებს - „სომხეთი“ და „მაქვს პატივი“ 34 დეპუტატი ჰყავთ. მმართველ პარტია „სამოქალაქო ხელშეკრულებას“ 69 მანდატი აქვს. პარლამენტის კიდევ ოთხი წევრი კი დამოუკიდებელი დეპუტატია.
v-if="article.gallery" v-html="article.gallery"
