მოიხსნას ისეთი მოწმეები, რომლებიც არ არიან კონკრეტული ინფორმაციის მომწოდებლები ამ ბრალდებულებთან მიმართებით. ჩვენ გვაინტერესებს ამ ადამიანებმა ჩაიდინეს თუ არა დანაშაული, ისინი კი არ გვაწვდიან კონკრეტულ ინფორმაციას, - აღნიშნული განცხადება ჯგუფურ ძალადობაში მონაწილეობისა და მისი ორგანიზების ბრალდებით ერთ-ერთი დაკავებულის, ვეფხია კასრაძის ადვოკატმა, კახა კოჟორიძემ სხდომაზე გააკეთა.
დღევანდელი პროცესი პროკურატურის მტკიცებულებების გამოკვლევით გრძელდება, მათ შორის მოწმის სახით დაიკითხა პოლიციელი გივი წიქორიძე. სწორედ წიქორიძის დაკითხვის შემდეგ გააკეთა აღნიშნული განცხადება კახა კოჟორიძემ.
„პირველივე მოწმის დაკითხვამ აჩვენა ის მოცემულობა, რასაც დაცვის მხარე ვარაუდობდა - მოწმე კონკრეტული პირების მიერ ჩადენილი დანაშაულის ჩადენაზე ინფორმაციას ვერ გვაწვდის. კითხვა არის შემდეგი- ბრალდებულებმა ჩაიდინეს, თუ არა დანაშაული და მოწმეთა უმრავლესობამ კონკრეტულ ბრალდებულთან მიმართებაში ვერ უპასუხა.
განცხადება ეხება შემდეგს - მოიხსნას ისეთი მოწმეები, რომლებიც არ არიან კონკრეტული ინფორმაციის მომწოდებლები ამ ბრალდებულებთან მიმართებით. ჩვენ გვაინტერესებს ამ ადამიანებმა ჩაიდინეს თუ არა დანაშაული. ისინი არ გვაწვდიან კონკრეტულ ინფორმაციას”. განაცხადა კახა კოჟორიძემ.
ამ ეტაპზე, კი სასამართლო სხდომაზე კიდევ ერთი მოწმე გელა გულორდავა იკითხება.
ცნობისთვის, დაკავებულებიდან სამს - ზვიად ცეცხლაძეს, ვეფხია კასრაძესა და ვასილ კაძელაშვილს ჯგუფური ძალადობის ორგანიზებასა და ხელმძღვანელობას ედავებიან. მათ 6-დან 9-წლამდე თავისუფლების აღკვეთა ემუქრებათ.
ბრალდებულებიდან ხუთს - გიორგი გორგაძეს, ირაკლი მიმინოშვილს, ინსაფ ალიევს, თორნიკე გოშაძეს და ნიკოლოზ ჯავახიშვილს ჯგუფურ ძალადობაში მონაწილეობას ედავებიან. მათ 4-დან 6-წლამდე თავისუფლების აღკვეთა ემუქრებათ.
