გაერთიანებული სამეფოს საგარეო საქმეთა მინისტრი, დევიდ ლემი დღეს ევროპელ კოლეგებს უმასპინძლებს, რათა უკრაინის მხარდაჭერისა და რეგიონული თავდაცვის სფეროში თანამშრომლობის გაფართოების საკითხები განიხილონ, - ინფორმაციას Reuters-ი ავრცელებს.

გაერთიანებული სამეფოს საგარეო საქმეთა სამინისტროს ცნობით, დევიდ ლემი მოლაპარაკებებს გამართავს საფრანგეთის, იტალიის, გერმანიის, ესპანეთის, პოლონეთისა და ევროკავშირის წარმომადგენლებთან.

„დღეს ჩვენს წინაშე არსებული გამოწვევა მხოლოდ უკრაინის მომავალს არ ეხება - ის მთელი ევროპისთვის ეგზისტენციალურია“, - აღნიშნა ლემმა.

შეგახსენებთ, გაერთიანებული სამეფოს, საფრანგეთის, გერმანიისა და პოლონეთის ლიდერები შაბათს კიევში ჩავიდნენ, რათა მხარი დაეჭირათ უკრაინის მოწოდებისთვის 30-დღიანი უპირობო ცეცხლის შეწყვეტის შესახებ. ისინი რუსეთის პრეზიდენტს, ვლადიმერ პუტინს მასიური ახალი სანქციებით დაემუქრნენ, თუ ის შეთანხმებას რამდენიმე დღეში არ დათანხმდებოდა.