ყველაფერს გავაკეთებთ, რომ თურქეთში პუტინთან შეხვედრა შედგეს, ვინაიდან მხოლოდ მასთან უნდა შევთანხმდე ცეცხლის შეწყვეტაზე, მხოლოდ ის წყვეტს ამას. ამის შესახებ უკრაინის პრეზიდენტმა, ვოლოდიმირ ზელენსკიმ ჟურნალისტებთან საუბარში განაცხადა.
“ყველაფერს გავაკეთებთ, რომ ეს შეხვედრა შედგეს. თუ პუტინი ნამდვილად მზად არის შეხვედრისთვის არა მხოლოდ მედიაში, არამედ რეალურ ცხოვრებაშიც. და მაშინ, ლიდერების დონეზე ყველაფერს გავაკეთებთ, რათა ცეცხლის შეწყვეტაზე შევთანხმდეთ. ვინაიდან სწორედ მასთან უნდა შევთანხმდე ცეცხლის შეწყვეტაზე, რადგან მხოლოდ ის წყვეტს ამას”, - განაცხადა ზელენსკიმ.
მისი თქმით, თუ მოლაპარაკებების დროს პუტინი ცეცხლის უპირობო შეწყვეტისთვის მზაობას გამოთქვამს, ეს გზას გახსნის მთლიანად ომის დასრულებისთვის უფრო დეტალური მოლაპარაკებებისთვის.
უკრაინის პრეზიდენტმა ასევე იმედი გამოთქვა, რომ პუტინთან მოლაპარაკებებს აშშ-ის პრეზიდენტი, დონალდ ტრამპიც შეუერთდება.
“პრეზიდენტ ტრამპს შეერთება შევთავაზეთ. არ ვიცი აშშ-ის პრეზიდენტის გადაწყვეტილება, მაგრამ ნებისმიერ შემთხვევაში, თუ ის თავის მონაწილეობას დაადასტურებს, ვფიქრობ, ამას დამატებითი იმპულსი ექნებოდა იმისთვის, რომ პუტინი ჩამოფრინდეს”, - განაცხადა ზელენსკიმ.
