მარცხენა ხელის არეში მომხვდა ნივთი, დამეწყო ძლიერი სისხლდენა, გადამიყვანეს კლინიკაში, სადაც ქირურგიული ჩარევა დამჭირდა, კლინიკაში 3 დღე დავყავი, - ამის შესახებ დაზარალებულმა პოლიციელმა ივანე კაპანაძემ სასამართლო პროცესზე განაცხადა, სადაც ის პარლამენტთან მიმდინარე საპროტესტო აქციების დროს ჯგუფური ძალადობის ორგანიზების და მასში მონაწილეობის ბრალდებით დაკავებული პირების საქმეზე ჩვენებას აძლევს.

პოლიციელმა ისაუბრა თუ რა ვითარება იყო 28 ნოემბერს, მიმდინარე საპროტესტო აქციაზე და როგორ მიიღო მან სხეულის დაზიანება. თუმცა, კაპანაძეს არ შეუძლია თქვას, თუ ვისი ქმედების მხრიდან მიიღო მან დაზიანება.

„ვითარება თავიდან მშვიდობიანი იყო, თუმცა, აქციის მონაწილეები მოულოდნელად გახდნენ აგრესიულები. ქვა, ბოთლები, ქვის ნაჭრები, ფოიერვერკები, საღებავიანი ბოთლები წვიმასავით მოდიოდა. ქუჩა, სადაც ჩვენ ვიდექით, ამ ნივთებით აივსო.

ქვების სროლის ტრაექტორიას ვხედავდი, ვცდილობდი მის არიდებას, თუმცა, ქვის ნამტვრევი მომხვდა“, - განაცხადა კაპანაძემ.

ადვოკატმა გუჯა ავსაჯანიშვილმა ჰკითხა, შეუძლია თუ არა მის მიმართ განხორციელებული ქმედების ჩამდენი ამოიცნოს, პოლიციელმა უარყოფითი პასუხი გასცა.

„უშუალო იდენტიფიცირება და ამოცნობა არ შემიძლია“, - განაცხადა კაპანაძემ.

ცნობისთვის, დაკავებულებიდან სამს - ზვიად ცეცხლაძეს, ვეფხია კასრაძესა და ვასილ კაძელაშვილს ჯგუფური ძალადობის ორგანიზებასა და ხელმძღვანელობას ედავებიან. მათ 6-დან 9-წლამდე თავისუფლების აღკვეთა ემუქრებათ.

ბრალდებულებიდან ხუთს - გიორგი გორგაძეს, ირაკლი მიმინოშვილს, ინსაფ ალიევს, თორნიკე გოშაძეს და ნიკოლოზ ჯავახიშვილს ჯგუფურ ძალადობაში მონაწილეობას ედავებიან. მათ 4-დან 6-წლამდე თავისუფლების აღკვეთა ემუქრებათ.