„დეილი ჯგუფმა“ და Tempo Beverages Ltd-მა (ტემპო ჯგუფი) წარმატებით დაასრულეს სტრატეგიული მოლაპარაკება, რომლის ფარგლებშიც „ტემპო ჯგუფი“ ქართული ლუდის კომპანიის („ზედაზენი“) 60%-იანი წილის მფლობელი გახდა.

Tempo Beverages Ltd. (ტემპო ჯგუფი) ლუდისა და სასმელების მწარმოებელი და სადისტრიბუციო წამყვანი კომპანიაა, რომელიც 1954 წლიდან საქმიანობს ისრაელსა და მის ფარგლებს გარეთ. კომპანიის სტრატეგიულ პარტნიორთა შორისაა ლუდის ინდუსტრიის გლობალური ლიდერი – Heineken, რომელიც, თავის მხრივ, „ტემპო ჯგუფის“ 40%-იან წილს ფლობს.

შესაბამისად, „ტემპო ჯგუფის“ ინვესტიციით, არაპირდაპირ, „ჰაინეკენიც“ „ზედაზენის“ მეწილე ხდება.

კახაბერ კოტრიკაძე, სს ქართული ლუდის კომპანია „ზედაზენის“ დირექტორი:

„ტემპო ჯგუფის“ ინვესტიცია არა მხოლოდ ადასტურებს საქართველოს ბაზრის საინვესტიციო პოტენციალს, არამედ ქართული ეკონომიკის გლობალურ ბიზნესქსელებში ინტეგრაციის თვალსაჩინო მაგალითია.

„ზედაზენში“ „ტემპო ჯგუფისა“ და „ჰაინეკენის“ გამოცდილებისა და საერთაშორისო ნდობის ინტეგრაცია კიდევ უფრო მეტად დააჩქარებს ტექნოლოგიური ინოვაციების დანერგვას ქართულ საწარმოში. მათთან პარტნიორობა ხელს შეუწყობს როგორც ქართულ პროდუქციაზე ნდობისა და, შესაბამისად, მოთხოვნის ზრდას საერთაშორისო ბაზრებზე, ისე ადგილობრივი ეკონომიკის განვითარებას“.

Daniel Beer, ,,ტემპო ჯგუფის” აღმასრულებელი დირექტორი

„ჩვენი მიზანია, რომ Tempo Beverages-ის გლობალური ქსელის, ტექნოლოგიური კომპეტენციისა და მარკეტინგული ექსპერტიზის გამოყენებით გავაძლიეროთ „ზედაზენის“ ლიდერობა შიდა ბაზარზე, დავნერგოთ ინოვაციური პროდუქტის ხაზები და განვავითაროთ ექსპორტის შესაძლებლობები. ამ პარტნიორობით ვხედავთ შესაძლებლობას, რომ „ზედაზენი“ იქცეს რეგიონის ერთ-ერთ გამორჩეულ სასმელების მწარმოებლად, რომელიც წარმატებით გავა საერთაშორისო ბაზრებზე და ამავე დროს შეინარჩუნებს ქართულ იდენტობას, ტრადიციასა და ადგილობრივ ღირებულებებს“.

გარიგების დასრულება სტრატეგიული თანამშრომლობის პირველი ნაბიჯია. მხარეები ინვესტიციების ახალ ტალღას გეგმავენ, რომელიც მოიცავს პროდუქციის განვითარებას, საწარმოო სიმძლავრეების გაზრდასა და ინოვაციური სტრატეგიების დანერგვას, რაც მაქსიმალურად იქნება მორგებული ადგილობრივი ბაზრის საჭიროებებზე.

(R)