ძალიან მნიშვნელოვანია მოხდეს ურთიერთობების გადატვირთვა, ახალი ფურცლიდან დაწყება. ჩვენთვის მნიშვნელოვანია ამერიკის სტრატეგიული პარტნიორობა, მეგობრობა. ეს ყველაფერი ცხადია, უნდა იყოს ორმხრივი, - ამის შესახებ თბილისის მერმა, კახა კალაძემ ჟურნალისტებს განუცხადა, რითაც საქართველოში სენატორ სტივ დეინსის ვიზიტს გამოეხმაურა.

მისივე თქმით, საქართველოს ხელისუფლება მზადაა მეგობრობისთვის.

„ძალიან მნიშვნელოვანია მოხდეს ურთიერთობების გადატვირთვა, ახალი ფურცლიდან დაწყება. ჩვენთვის მნიშვნელოვანია ამერიკის სტრატეგიული პარტნიორობა, მეგობრობა. ეს ყველაფერი ცხადია, უნდა იყოს ორმხრივი. ჩვენ ვხედავდით ბოლო წლების განმავლობაში „დიფ სთეითი“ რა განცხადებას აკეთებდა, როგორ ეპყრობოდა ქართულ სახელმწიფოს, რა დამოკიდებულება ჰქონდა ჩვენთან მიმართებით. ასეთი დამოკიდებულება, რა თქმა უნდა, კატეგორიულად მიუღებელია. პრემიერ-მინისტრმაც არაერთხელ გააკეთა გზავნილი, რომ საქართველოს ხელისუფლება მზადაა მეგობრობისთვის, იმისთვის, რომ ურთიერთობები ახალი ფურცლიდან დაიწყოს, გადაიტვირთოს ის ურთიერთობა, რაც იყო და ის ჩვენთვის კატეგორიულად მიუღებელი იყო. დაველოდოთ, როგორ განვითარდება მოვლენები. იცით, რომ აშშ-ის პრეზიდენტმა მთავარ პრიორიტეტად რუსეთ - უკრაინის ომის დამთავრება და „დიფ სთეითის“ დამარცხება დაისახა. პროცესი მიდის, დაველოდოთ თუ როგორ დასრულდება მისი ბრძოლა ყველა მიმართულებით.

კიდევ ერთხელ ვამბობთ, რომ საქართველოს მთავრობა, ხელისუფლება მზადაა, რომ მოხდეს ურთიერთობების გადატვირთვა, ურთიერთობები დაიწყოს ახალი ფურცლიდან და ეს იყოს ნამდვილი პარტნიორული, ნამდვილი მეგობრული. ჩვენთვისაც პრინციპულად მნიშვნელოვანია და დარწმუნებული ვარ, ამერიკისთვისაც, იმიტომ, რომ ძალიან მნიშვნელოვანი რეგიონია“,- განაცხადა კალაძემ.

ცნობისთვის, აშშ-ის სენატის საგარეო ურთიერთობათა კომიტეტის წევრი, სენატორი სტივ დეინსი საქართველოს სტუმრობს. ის უკვე შეხვდა ოპოზიციური პარტიების წარმომადგენლებს და ასევე, პრემიერ-მინისტრ, ირაკლი კობახიძეს.