ჩვენმა პარტნიორებმა უნდა გაიგონ ერთი რამ, რომ განცხადებებზე ხელისუფლება უკვე არ რეაგირებს, - ამის შესახებ პოლიტოლოგმა ვახტანგ ძაბირაძემ “პალიტრანიუსის” გადაცემა “360 გრადუსში” განაცხადა.

ძაბირაძის თქმით, არც შეზღუდული სანქციებია საკმარისი, ამიტომ, საჭიროა, ეფექტური მექანიზმები მოიძებნოს “ქართულ ოცნებაზე” ზეწოლისთვის.

“რა განცხადებებიც არ უნდა გაკეთდეს ბრიუსელსა თუ ვაშინგტონში, ამას რეაქცია არ მოჰყვება, ამიტომ, საჭიროა, რეალური მექანიზმები მოიძებნოს ხელისუფლებაზე ზეწოლისთვის. მარტო სანქციები, თანაც შეზღუდული, როგორც ჩანს, არ არის საკმარისი. მე მაინც მგონია, რომ “ქართული ოცნება” ძალიან მკვეთრ ნაბიჯებს არ გადადგამს იმის შესასრულებლად, რა გზავნილებიც გამოუგზავნა ტრამპმა. ის, ისევე, როგორც მოსკოვი, შეეცდება დრო გაწელოს. მალე საზაფხულო არდადეგები იწყება და ამ პროცესებს ნელ-ნელა გადაიტანს შემოდგომამდე, მითუმეტეს, როდესაც ჩვენი პარტნიორები უფრო კატეგორიულები და უფრო მობილიზებულები არიან, თუნდაც განცხადებების მხრივ, ვიდრე თავად ჩვენი საზოგადოება”, - აღნიშნა ძაბირაძემ.

პოლიტოლოგი ასევე გამოეხმაურა ვახტანგ გომელაურის შინაგან საქმეთა მინისტრობიდან წასვლის ფაქტსაც და გამოთქვა ვარაუდი, რომ “ქართული ოცნების” საპატიო თავმჯდომარე ბიძინა ივანიშვილი პოლიტიკურ რეზერვს ქმნის.

“გომელაურის წასვლა პოლიტიკური რეზერვია - ბიძინა ივანიშვილმა თავისი ხალხი გაიყვანა ამ თამაშიდან, თუმცა, საკმაოდ სახიფათო ვითარება შეიქმნა ივანიშვილისთვისაც. თუ ვერტიკალს მართლაც ირაკლი კობახიძე აკონტროლებს მთლიანად, კაცმა არ იცის, როგორ შეძლებს ამის განვითარებას. თუ ეს ივანიშვილის მიერ გარკვეული რეზერვია, ეს საკმაოდ ცუდი ვარიანტია იმიტომ, რომ მაშინ უნდა ვივარაუდოთ, რომ რეპრესიები და ძალადობა გაგრძელდება და უფრო მასშტაბურ ხასიათს მიიღებს. ეს რეზერვი მას სჭირდება იმისთვის, რომ რაღაც მომენტში ითქვას, რომ ისევ გომელაური ჯობდა ყოფილიყო”, - განაცხადა ვახტანგ ძაბირაძემ.