დღევანდელი რეპრესიული პოლიტიკის გათვალისწინებით, ვადამდელ საპარლამენტო არჩევნებზე მოლაპარაკების არარსებობის პირობებში ვერ ვხედავთ, როგორ შეიძლება საზოგადოების სარგებელს ემსახურებოდეს ჩვენი თვითმმართველობის არჩევნებში მონაწილეობა - თვითმმართველობის არჩევნებში მონაწილეობის თაობაზე ოპოზიციის საბოლოო გადაწყვეტილება ერთობლივი უნდა იყოს,- ამის შესახებ პარტია „თავისუფლების მოედნის“ განცხადებაშია ნათქვამი.

როგორც განცხადებაშია აღნიშნული, ისინი მზადყოფნით შეხვდებიან იმ ვითარებას, თუ დარწმუნდებიან, რომ არჩევნებში მონაწილეობა „ქართული ოცნების“ წასვლას დააჩქარებს“.

„თავისუფლების მოედანი“ დემოკრატიის დასამარების წინასწარ გამოცხადებულ გეგმაში მონაწილეობას არ აპირებს. დღეს, საქართველოში, საარჩევნო ადმინისტრაცია არც დამოუკიდებელია და არც მიუკერძოებელი, არსებობს გაყალბების უამრავი შესაძლებლობა, ხოლო არჩევნებზე დაკვირვებისა კი - აღარ. სამოქალაქო და მედია სივრცე გაქრობის პირასაა, სასამართლო მოქალაქეს აღარ იცავს, არჩევნები სუს-ის გეგმით იმართება, ქვეყანას 60-ზე მეტი პოლიტიკური პატიმარი ჰყავს, ხოლო ჩვენს კოლეგებს, ვისთანაც თანასწორ საარჩევნო მეტოქეობას ვისურვებდით, ქუჩებიდან იტაცებენ და უსამართლოდ სჯიან.

გადაწყვეტილება, მიიღოს თუ არა პარტიამ თვითმმართველობის არჩევნებში მონაწილეობა, უნდა ეფუძნებოდეს განსჯას იმის შესახებ, შეუძლია თუ არა არჩევნების არა მხოლოდ შედეგებს, არამედ თავად პროცესს, გააძლიეროს „ქართული ოცნების“ ჩამოშლა. დღევანდელი რეპრესიული პოლიტიკის გათვალისწინებით, ვადამდელ საპარლამენტო არჩევნებზე მოლაპარაკების არარსებობის პირობებში ვერ ვხედავთ, როგორ შეიძლება „თავისუფლების მოედნის“ მონაწილეობა თვითმმართველობის არჩევნებში საზოგადოების სარგებელს ემსახურებოდეს.

არჩევნებში მონაწილეობა ნებისმიერი პარტიის მთავარი ფუნქციაა, ხოლო თვითმმართველობის არჩევნები ახლად შექმნილი პარტიის განვითარების საუკეთესო შესაძლებლობაა. ამიტომ, თუ ვითარება შეიცვლება და ჩვენს ამომრჩევლებთან ერთად დავრწმუნდებით, რომ თვითმმართველობის არჩევნებში დემოკრატიული ძალების მობილიზაცია და მონაწილეობა „ქართული ოცნების“ წასვლას დააჩქარებს, ამასთან, ხელს შეუწყობს საპარლამენტო არჩევნების დანიშვნასა და პატიმრების გათავისუფლებას, ამას სათანადო მზადყოფნით შევხვდებით. გვჯერა, რომ „ოცნებას“ ნებისმიერ სამართლიან არჩევნებს მოვუგებთ.

რეჟიმის საბოლოო დამარცხებისთვის დემოკრატიული ოპოზიციის მოქმედების ერთიანი სტრატეგია კრიტიკულად მნიშვნელოვანია. თვითმმართველობის არჩევნებში მონაწილეობის თაობაზე ოპოზიციის საბოლოო გადაწყვეტილება, ასევე, ერთობლივი უნდა იყოს.

ვაგრძელებთ ბრძოლას პოლიტპატიმრების გასათავისუფლებლად, საარჩევნო გარემოს შესაცვლელად და ახალი, სამართლიანი არჩევნების დასანიშნად“,- ნათქვამია განცხადებაში.