მიმდინარე საპროტესტო აქციების ფარგლებში, სხვისი ნივთის დაზიანების ბრალდებით დაკავებულ არჩილ მუსელიანცის საქმეზე ჩვენებას პოლიციელი აძლევს.

ამ წუთებში თბილისის საქალაქო სასამართლოში სამართალდამცავი ვანო გავაშელიშვილის ჩვენებას ისმენენ.

მისი ჩვენების მიხედვით, არჩილ მუსელიანცი აქციაზე აგრესიულად იქცეოდა, იგინებოდა, რის გამოც მას ფოტო გადაუღო, მომდევნო დღეს კი, სოციალურ ქსელში ნახა, თუ როგორ წაუკიდა მუსელიანცმა კამერების კაბელებს ცეცხლი.

„იყო აგრესიული, აჟიტირებული, იგინებოდა, თან ნიღბით ჰქონდა სახე დაფარული. ამ ადამიანს თვალს ვადევნებდი, წყალი დალია, რა დროსაც ნიღაბი ჩამოიწია და მისი სახე დავაფიქსირე - გადავუღე ფოტო.

მეორე დღეს, სოციალურ ქსელში გადავაწყდი ვიდეოს, სადაც ჩემ მიერ ტელეფონით დაფიქსირებულმა პირმა კამერების კაბელებს მოუკიდა ცეცხლი, სახის ამომცნობი პროგრამით აღნიშნული პირის იდენტიფიცირება მოვახდინე. აღნიშნული ინფორმაცია პატაკის სახით მივაწოდე ხელმძღვანელობას",- განაცხადა გავაშელიშვილმა.

არჩილ მუსელიანცს ბრალდება სისხლის სამართლის კოდექსის 187-ე მუხლის მეორე ნაწილით აქვს წარდგენილი, რაც სხვისი ნივთის დაზიანებას გულისხმობს. აღნიშნული ბრალდება 3-დან 6-წლამდე თავისუფლების აღკვეთას ითვალისწინებს.

უფრო კონკრეტულად, მუსელიანცს ედავებიან, რომ პარლამენტის შენობის წინ ბოძზე დამაგრებულ კამერების დენის წყაროს მიზანმიმართული დაზიანება მიყენა და ცეცხლი წაუკიდა, რათა აქციაზე მყოფების სახეების იდენტიფიცირება შეუძლებელი ყოფილიყო.