ნამდვილად არ მიკვირს ეს შედეგები - ასე უპასუხა თბილისის მერმა, კახა კალაძემ ჟურნალისტებს შეკითხვას „ევრობარომეტრის“ მიერ გამოქვეყნებულ სოციალური კვლევის შედეგებთან დაკავშირებით, რომლის მიხედვითაც ევროკავშირისადმი ნდობა ერთ წელში 17%-ითაა შემცირებული.

როგორც კალაძემ აღნიშნა, მაშინ, როცა ქვეყნის ომში ჩათრევას ცდილობდნენ, ამას ცხადია, რეაგირება ექნებოდა.

„არც არის გასაკვირი, რამდენიმე სიტყვით ვიტყვი და ვფიქრობ, საზოგადოება სწორ ანალიზს გააკეთებს - მაშინ, როცა სააკაშვილი დაგვისახეს ევროპულ საზომად, რადიკალიზმი სამოქალაქო სტანდარტად, ომში ჩათრევას ცდილობდნენ, ეკონომიკის განადგურებას გვიქადდნენ, ცხადია, ამას რეაგირება მოჰყვება და ხალხი ამ ყველაფერს ხედავს, ნამდვილად არ მიკვირს ეს შედეგები“,- განაცხადა კახა კალაძემ.

ცნობისთვის, საქართველოში ევროკავშირისადმი ნდობა 9%-ით არის შემცირებული და 49%-ს შეადგენს. ამის შესახებ „ევრობარომეტრის“ გამოკითხვამ დაადგინა, რომელიც 2025 წლის გაზაფხულზე ჩატარდა. გამოკითხვის თანახმად, ქართველების 49% ენდობა ევროკავშირს, რაც 9%-ით ნაკლებია ვიდრე 2024 შემოდგომაზე (58%) და 17%-ით ნაკლებია, ვიდრე 2024 წლის გაზაფხულზე (66%).