ბოიკოტი არ შეიძლება იყოს თვითონ მიზანი, ბოიკოტს შედეგი უნდა ჰქონდეს, - ამის შესახებ „ძლიერი საქართველოს“ ერთ-ერთმა ლიდერმა, გიორგი სიორიძემ „პალიტრანიუსის“ გადაცემაში „თავისუფალი სტუდია“ განაცხადა.

გიორგი სიორიძის თქმით, „ძლიერი საქართველო“ თვითმმართველობის არჩევნებში მონაწილეობას განიხილავს, რადგან „არსებობს ამის სასარგებლო არგუმენტები“.

„ახლა მომწიფებულად ჩავთვალეთ დრო იმისთვის, რომ განვიხილოთ ორი ვარიანტი: ერთი ვარიანტია არჩევნების ბოიკოტი, მაგრამ არჩევნების ბოიკოტი არ შეიძლება იყოს თვითმიზანი, ბოიკოტს შედეგი უნდა ჰქონდეს. შედეგამდე მისაღწევი რა განვითარება, რა სცენარი მოჰყვება, ეს განვიხილოთ, რომელიც ჩვენ მოგვისმენია და პატივს ვცემთ, მაგრამ მეორე გზას, არა ბოიკოტს და მასში მონაწილეობას, ოღონდ ასევე ოპოზიციის ერთიანობის პირობებში, განვიხილავთ იმიტომ, რომ არსებობს ამის სასარგებლო არგუმენტებიც. მეორე აზრსაც, მეორე სცენარსაც შეიძლება ჰქონდეს არსებობის უფლება“, - განაცხადა გიორგი სიორიძემ.

გიორგი სიორიძის განცხადებით, თბილისის მერობის უბრძოლველად დათმობა კახა კალაძისთვის ალბათ „საჩუქარი იქნებოდა, რომელიც მას ძალიან გაახარებდა“.

„კახა კალაძეს ალბათ ყველაზე მეტად ესიამოვნებოდა, რომ უბრძოლველად და უპრობლემოდ მოიპოვოს მომდევნო ოთხი წლის განმავლობაში მანდატი. თუ ოპოზიციური პარტიები პასიურ მდგომარეობაში იქნებიან, მას საერთოდ არც დასჭირდება გაყალბება და შეეცდება, რომ ლეგიტიმაციის საბურველი მისცეს თავის მანდატს. საუბარია თბილისზე, სადაც „ქართულმა ოცნება“ რეალურად წააგო, არა მხოლოდ თავისი პროცენტის გათვალისწინებით, 40% რომ მიიღო, არამედ იმ შედეგითაც ოთხივე ბარიერგადალახული კოალიციის ჯამი საგრძნობლად აღემატებოდა „ქართული ოცნების“ შედეგს. ბრძოლის გარეშე მისთვის დათმობა, რა თქმა უნდა, იქნებოდა საჩუქარი მისთვის, რაც, ალბათ, ძალიან გაახარებდა და სწორედ ამ არგუმენტის გათვალისწინება გვინდა იყოს მაგიდაზე პარტნიორებთან მოლაპარაკებების დროს, რომლითაც შეიძლება ავწონ-დავწონოთ და ავირჩიოთ ან ერთი გზა, ან მეორე გზა. ჩვენ, რა თქმა უნდა, ბოიკოტის გზასაც განვიხილავთ“, - განაცხადა გიორგი სიორიძემ.