უნგრეთის მთავრობის პრესსპიკერი - ზელენსკი აწარმოებს კამპანიას უნგრეთში პარტია „ტისას“ სასარგებლოდ - ის უგულებელყოფს ფაქტს, რომ ვიქტორ ორბანი ყოველთვის დაიცავს უნგრეთის და არა უკრაინის ინტერესებს

უნგრეთის მთავრობა უკრაინის პრეზიდენტის, ვოლოდიმირ ზელენსკის მიერ უნგრეთის პრემიერ-მინისტრ ვიქტორ ორბანზე გაკეთებულ განცხადებას ეხმაურება და ზელენსკის უნგრეთის ოპოზიციური პარტიის, „ტისას“ სასარგებლოდ კამპანიის წარმოებაში ადანაშაულებს.

„უკრაინის პრეზიდენტი, ვოლოდიმირ ზელენსკი აწარმოებს კამპანიას უნგრეთში პარტია „ტისას“ სასარგებლოდ და პრემიერ-მინისტრ ვიქტორ ორბანს ანტიევროპელობასა და ომის პოლიტიკური სარგებლისთვის გამოყენებაში ადანაშაულებს. ის აქ არის და უნგრელებს ლექციებს უკითხავს უკრაინის ევროკავშირში გაწევრიანებასთან დაკავშირებით საჯარო კენჭისყრაში, Voks 2025-ში ხმის მიცემამდე. „ვიქტორი ისტორიულ შეცდომას უშვებს“, - ამბობს ის, ცდილობს რა ევროკავშირის ელიტასთან დაახლოებას და სხვებისგან მისი ომის დაფინანსების მოთხოვნას. შესაძლოა, მან ჯერ უნდა გადაამოწმოს, ვინ არის სინამდვილეში ევროკავშირის წევრი“, - წერს უნგრეთის მთავრობის პრესსპიკერი, ზოლტან კოვაჩი სოციალურ ქსელში.

მისი მტკიცებით, ზელენსკი უგულებელყოფს იმ ფაქტს, რომ პრემიერ-მინისტრი ორბანი, ყოველთვის დაიცავს უნგრეთის და არა უკრაინის ეროვნული უსაფრთხოების ინტერესებს.

„ზელენსკი აშკარად უგულებელყოფს მთავარ ფაქტს, რომ პრემიერ-მინისტრი ორბანი, როგორც უნგრეთის არჩეული ლიდერი, ყოველთვის დაიცავს უნგრეთის და არა უკრაინის ეროვნული უსაფრთხოების ძირითად ინტერესებს. მოდით, პირდაპირ ვიტყვი: არა, უკრაინის ევროკავშირში გაწევრიანება ამ ინტერესებში არ შედის, მიუხედავად იმისა, თუ რას იტყვის ზელენსკი“, - აცხადებს კოვაჩი.

შეგახსენებთ, უკრაინის პრეზიდენტმა, ვოლოდიმირ ზელენსკიმ უნგრულ მედიასთან ინტერვიუში განაცხადა, რომ ვიქტორ ორბანი უკრაინას საკუთარი საარჩევნო მიზნებისთვის იყენებს. „მას არ ესმის, რომ ამას გაცილებით სერიოზული და საშიში შედეგები მოჰყვება: უნგრეთის საზოგადოების რადიკალიზაცია და ანტიუკრაინული განწყობების გაღვივება. ის ამით პუტინს სამსახურს უწევს. სწორედ ამიტომ ვთქვი, რომ ვიქტორი სერიოზულ ისტორიულ შეცდომას უშვებს“, - აღნიშნა ზელენსკიმ.