ახლო აღმოსავლეთიდან მიღებული ცნობები ღრმად საგანგაშოა, - ასე ეხმაურება ევროკომისიის პრეზიდენტი, ურსულა ფონ დერ ლაიენი ისრაელის მიერ ირანის ბირთვულ და სამხედრო ობიექტებზე განხორციელებულ დარტყმებს.

„ევროპა მოუწოდებს ყველა მხარეს, გამოიჩინონ მაქსიმალური თავშეკავება, დაუყოვნებლივ შეამცირონ ვითარების ესკალაცია და თავი შეიკავონ საპასუხო ქმედებისგან“, - წერს ევროკომისიის პრეზიდენტი.

მისი თქმით, რეგიონის სტაბილურობისა და გლობალური უსაფრთხოების უზრუნველყოფის მიზნით, კონფლიქტის დიპლომატიური გზით გადაწყვეტა ახლა ისე სასწრაფოა, როგორც არასდროს.

შეგახსენებთ, ისრაელმა ირანში ბირთვულ და სამხედრო ობიექტებს დაარტყა. ისრაელის თავდაცვის ძალების ინფორმაციით, ისრაელის მიერ ირანზე განხორციელებული დარტყმების შედეგად დაიღუპნენ ირანის არმიის შტაბის უფროსი, ირანის ისლამური რევოლუციის გუშაგთა კორპუსის (IRGC) მეთაური და ირანის საგანგებო სიტუაციების სარდლობის სარდალი. საპასუხოდ, ირანმა ისრაელის ტერიტორიის მიმართულებით 100-მდე დრონი გაუშვა.