გვაქვს მტკიცებულებები, რომ რუსები ევროპის ტერიტორიაზე ახალ სამხედრო ოპერაციებს ამზადებენ - ამის შესახებ უკრაინის პრეზიდენტი ვოლოდიმირ ზელენსკი სოციალურ ქსელში წერს.

ზელენსკის თქმით, მან მოისმინა უკრაინის დაზვერვის უფროსის, კირილ ბუდანოვის ანგარიში და ბევრი დეტალი რუსეთში არსებული ვითარებისა და მისი თავდაცვის ინდუსტრიის შესახებ.

"ჩვენ ვიცით აგრესორი სახელმწიფოს ძირითადი დაუცველობები და შესაბამის დარტყმას მივაღწევთ ჩვენი სახელმწიფოსა და ხალხის დასაცავად, ასევე, რუსეთის აგრესიის უნარის მნიშვნელოვნად შესამცირებლად.

ჩვენ ვაკვირდებით რუსეთის ხელმძღვანელობაში ინტელექტუალური დაცემის მუდმივ ტენდენციას და გვაქვს მტკიცებულებები, რომ ისინი ევროპის ტერიტორიაზე ახალ სამხედრო ოპერაციებს ამზადებენ" - წერს ზელენსკი.

მისივე თქმით, უკრაინა ასევე ხედავს რუსეთის ეკონომიკურ სისტემაზე სანქციებით მიყენებულ ძალიან ხელშესახებ ზიანს, რაც ადასტურებს უკრაინის კურსის სისწორეს, რომელიც რუსეთს ომის დასრულებას სანქციების გამკაცრებითა და ზეწოლის სხვა ფორმებით აიძულებს.

"ჩვენ ჩვენს პარტნიორებს ვაცნობებთ ჩვენი დაზვერვის სამსახურების მიერ მოპოვებული ფაქტების შესახებ. ჩვენ ვამზადებთ თავდაცვის ერთობლივ გადაწყვეტილებებს, განსაკუთრებით, გაერთიანებულ სამეფოსა და ევროკავშირთან. მადლობას ვუხდი ყველას მთელ მსოფლიოში, ვინც გვეხმარება სიცოცხლის დაცვაში" - წერს უკრაინის პრეზიდენტი.