დაბრუნდება, რა თქმა უნდა - ბატონი გახარიას საქართველოში არ ყოფნა საერთოდ არ უკავშირდება კომისიაზე დაბარება არ დაბარებას, - ამის შესახებ პარტია „გახარია საქართველოსთვის“ წევრმა, გიორგი შარაშიძემ „პალიტრანიუსის“ გადაცემაში „360 გრადუსი“ განაცხადა.

გიორგი შარაშიძე აცხადებს, რომ „ჯერჯერობით ველოდებით კომისიის მხრიდან მისი უფლების დადასტურებას, რომ მას შეუძლია ჩაერთოს დისტანციურად“.

„ქვეყანაში დაბრუნდება იმიტომ, რომ მისი წასვლა არ არის დაკავშირებული ამ კომისიასთან საერთოდ. მისი წასვლა იყო დაგეგმილი ვიზიტი, ეს იყო წინასწარ შეთანხმებული ვიზიტი და მისი დაკავშირება არ იქნება სამართლიანი ამ კომისიაზე გამოცხადებასთან“, - განაცხადა გიორგი შარაშიძემ.

გიორგი შარაშიძის განმარტებით, სამართლებრივი თვალსაზრისით, არ აქვთ უფლება, რომ გიორგი გახარიას კომისიაზე მისვლა მოითხოვონ.

„სამართლებრივად არანაირი უფლება, რომ მოითხოვო მისი[გახარია] ფიზიკურად მისვლა კომისიაზე მათ არ აქვთ. სამართლებრივად ბატონი გახარიას სტატუსი არაფრით არ განსხვავდება ნებისმიერი სხვა პირის სტატუსისგან, რომელთა გამოკითხვაც უკვე შედგა, მათ შორის დისტანციური მეთოდით. როდესაც ბატონმა გახარიამ ჩაიბარა კომისიაზე მოწვევა წერილობით, მაშინ მას, რა თქმა უნდა, არც უფიქრია, რომ მისი დაგეგმილი ვიზიტი რამენაირად ხელს შეუშლიდა გამოკითხვას, რადგან უკვე იყო ასეთი შეთავაზება კომისიის მხრიდან“, - განაცხადა გიორგი შარაშიძემ.

ცნობისთვის, პარლამენტის დროებითი საგამოძიებო კომისია პარტია „გახარია საქართველოსთვის“ ლიდერ გიორგი გახარიას 2 ივლისამდე აძლევს ვადას, იმისათვის, რომ პარლამენტის საგამოძიებო კომისიაზე გამოცხადდეს. თავის მხრივ, გახარიას პარტიაში აცხადებენ, რომ ყოფილი შს მინისტრი მზად არის „სოფელ ჩორჩანასთან დაკავშირებულ კითხვებს 2 ივლისსაც დისტანციურად უპასუხოს“.