აღმოსავლეთ-დასავლეთ უნივერსიტეტმა არიზონის სახელმწიფო უნივერსიტეტთან პარტნიორობის ხელშეკრულება გააფორმა. თანამშრომლობის მიზანია აღმოსავლეთ-დასავლეთ უნივერსიტეტი გახდეს რეგიონული ჰაბი კავკასიაში და საქართველოში ჩამოყალიბდეს, როგორც ინოვაციური, ინტერდისციპლინური და საერთაშორისო განათლების ცენტრი.

არიზონის სახელმწიფო უნივერსიტეტის მხარდაჭერით, აღმოსავლეთ-დასავლეთ უნივერსიტეტი უერთდება ASU-Cintana-ს ალიანსს, რათა გარდაქმნას უმაღლესი განათლება საქართველოში და მოამზადოს როგორც ადგილობრივი, ისე უცხოელი სტუდენტები საერთაშორისო კარიერისთვის.

არიზონის სახელმწიფო უნივერსიტეტი (ASU) ათი წელია აშშ-ის ყველაზე ინოვაციურ უნივერსიტეტად სახელდება U.S. News & World Report-ის მიერ (2016-2025 წწ.). აღმოსავლეთ-დასავლეთ უნივერსიტეტის სტუდენტებს წვდომა ექნებათ ASU-ს სტანდარტებზე დაფუძნებულ სასწავლო პროგრამებზე, მსოფლიოში წამყვანი პროფესორების გამოცდილების გაზიარებაზე, გლობალურ მასტერკლასებზე, საერთაშორისო კვლევით თანამშრომლობაზე და სტუდენტთა გაცვლით პროგრამებზე.

ASU-სთან პარტნიორობით შემუშავებული გაფართოებული პროგრამები სტუდენტებს შესაძლებლობას მისცემს მიიღონ ASU-ის და აღმოსავლეთ-დასავლეთ უნივერსიტეტის ორმაგი ხარისხის დიპლომები, გადააწყონ საკუთარი აკადემიური გზა საჭიროებების შესაბამისად, რაც მნიშვნელოვნად გაზრდის მათი დასაქმების შესაძლებლობას როგორც ადგილობრივ, ისე საერთაშორისო ბაზარზე.

აღმოსავლეთ-დასავლეთ უნივერსიტეტის ამბიციური ზრდა განპირობებული იქნება როგორც მედიცინის პროგრამის გაძლიერებით, ისე მომდევნო ხუთი წლის განმავლობაში 22 ახალი აკადემიური პროგრამის შექმნის გზით.

ახალი პროგრამები მოიცავს ჯანმრთელობის მეცნიერებებს, ბიზნესს, ციფრულ ტექნოლოგიებსა და სოციალურ მეცნიერებებს — იმ დარგებს, სადაც მაღალი ხარისხის განათლებაზე მოთხოვნა მკვეთრად იზრდება როგორც საქართველოში, ასევე მთლიანად რეგიონში. ინიციატივა ხორციელდება უმაღლესი განათლებისთვის გარდამტეხ პერიოდში, როდესაც საერთაშორისო სტუდენტების რაოდენობა საქართველოში წლიურად დაახლოებით 24%-ით იზრდება.

(R)