დანაშაულში მონაწილე არასრულწლოვანებისთვის რესოციალიზაციის შანსის მიცემა და მსხვერპლთათვის ვიქტიმიზაციის სიმძიმის შემსუბუქება სწორ პრიორიტეტად მესახება, - ამის შესახებ საქართველოს გენერალური პროკურორობის კანდიდატმა გიორგი გვარაკიძემ პარლამენტის იურიდიულ საკითხთა კომიტეტის სხდომაზე სიტყვით გამოსვლისას განაცხადა.

მისი თქმით, ბოლო წლებში არაერთი რეფორმა გატარდა კანონთან კონფლიქტში მყოფი არასრულწლოვანების, ასევე, მოწმე და დაზარალებული ბავშვებისთვის საერთაშორისო სტანდარტების შესაბამისი სამართლებრივი მექანიზმების დანერგვისთვის, ეს მიმართულება პროკურატურის სტრატეგიით განსაზღვრული პრიორიტეტია და აუცილებელია დარჩეს განსაკუთრებული ყურადღების ქვეშ.

„ერთი მხრივ, დანაშაულზე პროპორციული სამართლებრივი პასუხი და, მეორე მხრივ, არასრულწლოვანისთვის მართლმსაჯულების ტვირთის შემსუბუქება საპროკურორო საქმიანობის ერთ-ერთ სირთულეს წარმოადგენს, კანონთან კონფლიქტში მყოფი არასრულწლოვანების მიერ დანაშაულის ჩადენის მზარდი მაჩვენებელი კი - დღევანდელობის გამოწვევაა.

სამომავლოდ დაბალანსებული სისხლის სამართლის პოლიტიკის დაგეგმვისთვის საკვლევია არასრულწლოვან მსჯავრდებულთა მიერ ჩადენილი დანაშაულის რეციდივი. პრევენციის გასაძლიერებლად ვებგვერდზე განვათავსებთ გზამკვლევს არასრულწლოვანებისთვის, სადაც გამარტივებული ფორმით, მათთვის გასაგებ ენაზე იქნება მიწოდებული ინფორმაცია არასრულწლოვანთა მართლმსაჯულების პროცესში მონაწილეობისას მათი უფლება-მოვალეობების შესახებ“, - განაცხადა გიორგი გვარაკიძემ.

ამასთან, როგორც გვარაკიძემ აღნიშნა, არასრულწლოვანების მიმართ სასჯელები არ უნდა გამკაცრდეს.

„ვერ გავამკაცრებთ არასრულწლოვანების მიმართ სასჯელებს, იმიტომ, რომ ეს არის ჩვენი ქვეყნის მომავალი და მაქსიმალურად უნდა შევეცადოთ ბალანსი დავიცვათ მათ მიერ ჩადენილ დანაშაულსა და მათთვის მისჯილ სასჯელებს შორის. ვფიქრობ, რომ უნდა მივცეთ უფრო მეტი შანსი რესოციალიზაციის. მეტად ჩავრთოთ საზოგადოებრივ საკითხებში“,- განაცხადა გვარაკიძემ.

ცნობისთვის, საქართველოს პარლამენტის იურიდიულ საკითხთა კომიტეტის სხდომაზე გენერალური პროკურორობის კანდიდატის გიორგი გვარაკიძის მოსმენა მიმდინარეობს.