იმედი მაქვს, რომ ახალ ფორმატში ჩვენ შევძლებთ იმ მნიშვნელოვანი სტრატეგიული პროექტების კიდევ უფრო დაჩქარებას, რომელიც ქვეყნის შემდეგი განვითარებისთვის არის ძალიან მნიშვნელოვანი, - ამის შესახებ პრემიერის მთავარი მრჩევლისა და ეკონომიკური საბჭოს მდივნის თანამდებობაზე დანიშნულმა ლევან დავითაშვილმა მთავრობის ადმინისტრაციაში ბრიფინგზე განაცხადა.

მისი თქმით, მოხარულია იმ ფაქტით, რომ ქვეყნისთვის საკმაოდ რთულ ბევრი გამოწვევის პირობებში ჰქონდა შანსი მაღალ თანამდებობაზე ემუშავა და იმედი აქვს, ქვეყნისთვის ახალ ფორმატშიც ბევრის გაკეთებას შეძლებს.

„მინდა პირველ რიგში მადლობა გადაგიხადოთ ბატონო პრემიერო იმისთვის, რომ მქონდა შანსი წელიწადზე მეტი ხნის განმავლობაში მემუშავა და ქვეყნისთვის საკმაოდ რთულ ბევრი გამოწვევის პირობებში უზრუნველგვეყო ეკონომიკური ზრდა და ქვეყნის სტაბილური განვითარება. იმედი მაქვს, რომ ახალ ფორმატში ჩვენ შევძლებთ იმ მნიშვნელოვანი სტრატეგიული პროექტების კიდევ უფრო დაჩქარებას, რომელიც ქვეყნის შემდეგი განვითარებისთვის არის ძალიან მნიშვნელოვანი. მე მინდა ვისარგებლო შემთხვევით და განსაკუთრებული მადლობა გადავუხადო პარტია „ქართული ოცნების“ დამფუძნებელს ბატონ ბიძინა ივანიშვილს, რომელმაც საშუალება მომცა, რომ წლების განმავლობაში მაღალ სახელმწიფო თანამდებობებზე მემუშავა სხვადასხვა მიმართულებით და გარკვეული წვლილი შეგვეტანა ჩვენი ქვეყნის განვითარებაში. ვფიქრობ, რომ ეს იყო უნიკალური შანსი, რომელიც პირადად ჩემთვის იყო დაუვიწყარი. მე მინდა წარმატებები ვუსურვო მარიამ ქვრივიშვილს ახალ პოზიციაზე“, - განაცხადა დავითაშვილმა.

ცნობისთვის, საქართველოს პრემიერ-მინისტრმა, ირაკლი კობახიძემ მთავრობის ადმინისტრაციაში ბრიფინგზე განაცხადა, რომ ეკონომიკისა და მდგრადი განვითარების მინისტრი ლევან დავითაშვილი თანამდებობას ტოვებს.

როგორც კობახიძემ აღნიშნა, ლევან დავითაშვილი ეკონომიკურ საკითხებში პრემიერის მთავარი მრჩევლისა და ეკონომიკური საბჭოს მდივნის თანამდებობას დაიკავებს, ეკონომიკის მინისტრად კი მარიამ ქვრივიშვილი დაინიშნა.