არსად მივიმალები, რადგან ყოველ საღამოს რუსთაველზე უნდა ვიყო - ისეთ ვითარებაში, სადამდეც ქვეყანა დაიყვანეთ, ზემოქმედებისა და ანგარიშსწორების საფრთხე ჩემი მისამართითაა, მათ შორის ციხეში, - ამის შესახებ პოლიციელზე თავდასხმის საქმეზე დაკავებულმა პოეტმა, ზვიად რატიანმა განაცხადა.

მისივე თქმით, ის ასევე არ აპირებს, რომ დანაშაული განმეორებით ჩაიდინოს.

"რაც შეეხება საფრთხეებს, პუნქტობრივად მივყვები. არსად მივიმალები, რადგან მე ყოველ საღამოს რუსთაველზე უნდა ვიყო. მოწმეებზე ზემოქმედებას რაც შეეხება, ისეთ ვითარებაში, სადამდეც ქვეყანა დაიყვანეთ, ზემოქმედებისა და ანგარიშსწორების საფრთხე ჩემი მისამართითაა, მათ შორის, ციხეში.

რაც შეეხება დანაშაულის გამეორებას - იმ საქმეში, რომელსაც მე ვემსახურები - ლიტერატურაში, ერთი და იმავე მეტაფორის გამოყენება ლამაზი არ არის.

რასაც ბრალად მიყენებთ, ამის გამეორებას არ ვაპირებ", - განაცხადა ზვიად რატიანმა.

ინფორმაციისთვის, თბილისის საქალაქო სასამართლოში პოლიციელზე თავდასხმის ფაქტზე პოეტ ზვიად რატიანის სასამართლო პროცესი მიმდინარეობს. პროკურატურა პოეტისთვის პატიმრობის შეფარდებას, დაცვის მხარე კი, ზვიად რატიანისთვის აღკვეთის ღონისძიების სახით 10 000-ლარიანი გირაოს გამოყენებას მოითხოვს.

ცნობისთვის, პოეტი ზვიად რატიანი პოლიციელზე თავდასხმის ბრალდებით 23 ივნისს დააკავეს.

ბრალდება საქართველოს სისხლის სამართლის კოდექსის 353-ე პრიმა მუხლის პირველი ნაწილით (პოლიციელზე თავდასხმა, პოლიციელის სამსახურებრივ საქმიანობასთან დაკავშირებით) წარედგინა, რაც სასჯელის სახედ და ზომად 4-დან 7 წლამდე თავისუფლების აღკვეთას ითვალისწინებს.