ჯგუფურ ძალადობაში მონაწილეობის ბრალდებით დაკავებული 11 პირი სასამართლოს მიერ მათთვის სავალდებულო წესით დანიშნული საზოგადოებრივი ადვოკატების აცილების შუამდგომლობას აყენებენ.

შუამდგომლობას მათი კერძო ადვოკატებიც დაეთანხმებიან, ვინაიდან როგორც ისინი აცხადებენ, მოსამართლე ნინო გალუსტაშვილმა ბრალდებულებს კანონდარღვევით, სავალდებულო წესით დაუნიშნა ადვოკატები.

უფლებადამცველების განმარტებით, მათ არ აქვთ მოლოდინი, რომ მოსამართლე ამ შუამდგომლობას დააკმაყოფილებს.

სხდომა თბილისის საქალაქო სასამართლოში ამ წუთებში მიმდინარეობს.

ცნობისთვის, პარლამენტთან მიმდინარე საპროტესტო აქციების დროს, ჯგუფურ ძალადობაში მონაწილეობის ბრალდებით 11 პირი დააკავეს.

დაკავებულებს - ანდრო ჭიჭინაძეს, ონისე ცხადაძეს, ჯანო არჩაიას, რუსლან სივაკოვს, ლუკა ჯაბუას, გურამ მირცხულავას, ვალერი თეთრაშვილს, გიორგი ტერიშვილს, ირაკლი ქერაშვილს, რევაზ კინაძესა და სერგეი კუხარჩუკს ბრალი საქართველოს სისხლის სამართლის კოდექსის 225-ე მუხლის მეორე ნაწილით წარედგინათ, რაც ჯგუფურ ძალადობაში მონაწილეობას გულისხმობს.

აღნიშნული დანაშაული სასჯელის სახედ და ზომად 4-დან 6 წლამდე თავისუფლების აღკვეთას ითვალისწინებს.