„ოცნება“ პუტინის ოცნებას ვერ აასრულებს ბოლომდე, - ასე უპასუხა პოლიტიკოსმა გივი თარგამაძემ ჟურნალისტების კითხვას, როდესაც ის ხელბორკილებითა და პოლიციის თანხლებით პოლიციის განყოფილებას ტოვებდა.

დროებითი საგამოძიებო კომისიაზე მიუსვლელობის საქმეზე პოლიტიკოსს 7 თვით თავისუფლების აღკვეთა მიესაჯა და 2 წლით თანამდებობის დაკავება აეკრძალა.

თარგამაძე სასამართლოს გადაწყვეტილებას საკუთარ სახლში ელოდებოდა, გადაწყვეტილების გამოცხადების შემდგომ კი, პოლიციაში საკუთარი ნებით გამოცხადდა. გივი თარგამაძეს ხელბორკილები ვაკე- საბურთალოს პოლიციის განყოფილებაში შესვლამდე დაადეს. როგორც მან დაპატიმერებამდე მედიასთან განაცხადა, ის ფიქრობს, რომ “რუსეთის დაკვეთით დააკავეს”.

ცნობისთვის, გივი თარგამაძეს ბრალი სისხლის სამართლის კოდექსის 349-ე მუხლით წარედგინა, რაც „საქართველოს პარლამენტის დროებითი საგამოძიებო კომისიის მოთხოვნის შეუსრულებლობას“ გულისხმობს. აღნიშნული ქმედება ისჯება ჯარიმით, ან თავისუფლების აღკვეთით ვადით ერთ წლამდე, თანამდებობის დაკავების, ან საქმიანობის უფლების ჩამორთმევით ვადით სამ წლამდე.