ელენე ხოშტარიას მინდა ჯანმრთელობა ვუსურვო. ცხადია, ოპოზიციაში დაპირისპირება არსებობს. ისეთი პოლიტიკური ფიგურები არიან, მათი ერთობა წარმოუდგენელია, შეუძლებელია, - ამის შესახებ დედაქალაქის მერმა, „ქართული ოცნების“ გენერალურმა მდივანმა კახა კალაძემ განაცხადა, რითაც პოლიტიკოსის ელენე ხოშტარიას განცხადებას გამოეხმაურა, რომ შიმშილობას შეწყვეტს, თუ ოპოზიცია შეთანხმდება და არჩევნებში მონაწილეობას არ მიიღებს.

როგორც კალაძემ აღნიშნა, პატრონები გარედან ცდილობენ, რომ მოხდეს ოპოზიციის გაერთიანება, ერთი პლატფორმა შეიქმნას, სადაც ერთად იქნებიან.

„აღნიშნული გადაწყვეტილება [შიმშილი] მიუთითებს თუ რა მდგომარეობაა ოპოზიციაში. ელენე ხოშტარიას მინდა ჯანმრთელობა ვუსურვო. ცხადია, ოპოზიციაში დაპირისპირება არსებობს. ისეთი პოლიტიკური ფიგურები არიან, მათი ერთობა წარმოუდგენელია, შეუძლებელია. მესმის, საკუთარი პატრონები გარედან ცდილობენ, რომ მოხდეს გაერთიანება, ერთი პლატფორმა შეიქმნას, სადაც ერთად იქნებიან…. ამის არაერთი მცდელობა იყო. დღეს რამდენიმე პოლიტიკურ ჯგუფს აქვს მიღებული გადაწყვეტილება რომ არჩევნებში მიიღოს მონაწილეობა. მათიც მესმის. თუ პოლიტიკური პროცესებში არ იღებ მონაწილეობას, რადარებიდან გაქრები. თუნდაც მცირე მხარდაჭერა და თანადგომა ვერ გექნება საზოგადოების მხრიდან. ჩვენ ვხედავთ აზრთა სხვადასხვაობას, განხეთქილებას, მაგრამ დეტალებში შესვლა არ მინდა”,- აღნიშნა კალაძემ.

შეგახსენებთ, საქართველოს პარლამენტთან პოლიტიკოსებმა ელენე ხოშტარიამ და გედევან ფოფხაძემ პროტესტის ნიშნად შიმშილობა დაიწყეს. ხოშტარიასა და ფოფხაძის შიმშილობის აქტს შეუერთდნენ სამოქალაქო აქტივისტები ვასილ ელიავა, გიორგი სტეპანოვა და ბაჩო კუცია.