ბიზნესისა და ტექნოლოგიების უნივერსიტეტსა და Oxford-ის უნივერსიტეტის Fintech & Legaltech Society-ს შორის პარტნიორობის შესახებ შეთანხმება გაფორმდა. ოქსფორდის უნივერსიტეტის ფინტექისა და ლიგალტექის საზოგადოება - OFLS ფოკუსირებულია ფინანსური და იურიდიული ტექნოლოგიების გარშემო ცნობიერების ამაღლებაზე, ახალი პროდუქტების შექმნასა და განვითარებაზე, გლობალურ დონეზე არსებული ტენდენციების შემუშავებასა და გამოყენების მხარდაჭერაზე.

მემორანდუმის ფარგლებში დაგეგმილია ბტუ-ისა და OFLS-ის მიერ ლიგალტექისა და ფინტექის მიმართულებით ერთობლივი პროექტებისა და ღონისძიებების მოწყობა, წევრების მიერ ერთობლივი პუბლიკაციების გამოქვეყნება და საჯარო ლექციების ორგანიზება ბიზნესისა და ტექნოლოგიების უნივერსიტეტის სტუდენტებისთვის.

Oxford Fintech & Legaltech Society დაარსდა 2017 წელს ოქსფორდის უნივერსიტეტის ბაზაზე და მას შემდეგ ჩამოყალიბდა, როგორც ერთ-ერთი ყველაზე აქტიური და გავლენიანი პლატფორმა ფინანსური და სამართლის ტექნოლოგიების მიმართულებით. ორგანიზაცია აერთიანებს სხვადასხვა ქვეყნიდან უნივერსიტეტების, ინდუსტრიის ლიდერების, სტარტაპების წარმომადგენლებსა და სტუდენტებს.

OFLS ხელს უწყობს ინოვაციური იდეების განვითარებას ისეთ თანამედროვე ტექნოლოგიურ მიმართულებებში, როგორიცაა ბლოკჩეინი, კრიპტოვალუტა, ხელოვნური ინტელექტი სამართალში, სმარტ-კონტრაქტები, რეგტექი და სხვა. მისი წევრები იღებენ წვდომას კვლევით პროექტებზე, პრაქტიკულ სემინარებსა და ვორქშოპებზე, ასევე პანელურ დისკუსიებზე, რომლებიც ტარდება როგორც ოქსფორდში, ისე ონლაინ ფორმატში.

გარდა ამისა, Oxford University Fintech & Legaltech Society აქტიურად თანამშრომლობს წამყვან უნივერსიტეტებთან და მსხვილ იურიდიულ თუ ფინანსურ ტექნოლოგიურ კომპანიებთან, რაც მის წევრებს სთავაზობს უნიკალურ შესაძლებლობებს ცოდნის გაღრმავებისთვის, პროფესიული კავშირების დამყარებისა და კარიერული განვითარების თვალსაზრისით.

ბიზნესისა და ტექნოლოგიების უნივერსიტეტისთვის წევრობა ოქსფორდის უნივერსიტეტის ფინტექისა და ლიგალტექის საზოგადოება - OFLS-ში ქმნის ახალ შესაძლებლობებს კვლევისა და საერთაშორისო თანამშრომლობის კუთხით, რაც სტუდენტებსა და აკადემიურ გუნდს საშუალებას აძლევს, ჩაერთონ წამყვან საერთაშორისო ღონისძიებებში, განავითარონ აკადემიური და პრაქტიკული უნარები და დაამყარონ კავშირები მსოფლიო ტექნოლოგიურ და ფინანსურ ცენტრებთან.

(R)