„ბაზისბანკს“ და „საქართველოს ბანკს“ შორის მომენტალური გადარიცხვების სისტემის დასანერგად თანამშრომლობის მემორანდუმი გაფორმდა
ციფრული სერვისების განვითარებისა და სამომხმარებლო გამოცდილების გაუმჯობესების მიზნით, ბაზისბანკს და პარტნიორ ბანკებს შორის, საქართველოს ბანკის მიერ მომენტალური გადარიცხვების ინოვაციური სისტემის დასანერგად, თანამშრომლობის მემორანდუმდი გაფორმდა. სერვისი მომხმარებლებისთვის სულ მალე გახდება ხელმისაწვდომი.
მომენტალური გადარიცხვების ინოვაციური სისტემა საქართველოში პირველად ინერგება და მისი დახმარებით ფიზიკურ პირებს შესაძლებლობა ექნებათ, თანხა ბაზისბანკის, საქართველოს ბანკის, პროკრედიტ ბანკისა და კრედო ბანკს შორის მხოლოდ მობილურის ნომრის გამოყენებით გადარიცხონ. ტრანზაქცია მიმღების ანგარიშზე მომენტალურად, დღე-ღამის ნებისმიერ დროს აისახება. საგულისხმოა, რომ თანხის გადარიცხვა როგორც ეროვნულ ვალუტაში, ისე ევროსა და დოლარში იქნება შესაძლებელი. გარდა ამისა, ეროვნულ ვალუტაში ერთჯერადად გადარიცხვისას მაღალი, 10,000 ლარის ოდენობის ლიმიტი იმოქმედებს. მომხმარებლები შეძლებენ დღის განმავლობაში გადარიცხვის შესრულება შეუზღუდავი სიხშირით განახორციელონ.
„ბაზისბანკისთვის პრიორიტეტულია, რომ საკუთარ მომხმარებელს მუდმივად შესთავაზოს სწრაფი და მოქნილი საბანკო მომსახურება და მაქსიმალურად გაუმარტივოს ფინანსურ სერვისებზე ხელმისაწვდომობა. ოთხ ქართულ ბანკს შორის დაწყებული თანამშრომლობა, შესაძლებლობას მისცემს თავიანთ მომხმარებლებს, რომ მომენტალურად, მხოლოდ მობილურის ნომრის გამოყენებით გადარიცხონ ან საკუთარ ანგარიშებს შორის მიიღონ თანხა დღე-ღამის ნებისმიერ მონაკვეთში. ეს კი, ერთი მხრივ არის ინოვაციური შესაძლებლობა და მეორე მხრივ, დარწმუნებული ვარ, ბიძგს მისცემს მსგავსი ტექნოლოგიური სერვისების განვითარებას ქართულ საბანკო სფეროში.“ - აღნიშნა ბაზისბანკის გენერალურმა დირექტორმა, დავით ცაავამ.
„აღნიშნული სიახლე სამომხმარებლო გამოცდილების გაუმჯობესებისკენ გადადგმული მნიშვნელოვანი ნაბიჯია. მისი მეშვეობით პარტნიორ ბანკებთან ერთად მომხმარებლებს შესაძლებლობას ვაძლევთ, მარტივად შეასრულონ გადარიცხვები და თანხა სასურველ დროს მიიღონ. მოხარული ვარ, რომ ამ პროცესში საქართველოს ბანკთან ერთად სამი ბანკი ჩაერთო, რითაც ჯამში ასეულობით ათას მომხმარებელს უფრო სწრაფი და ეფექტიანი საბანკო სერვისის მიღების შესაძლებლობას ვაძლევთ. ვფიქრობ, ეს ქვეყნის ფინანსური ინფრასტრუქტურის ციფრული ტრანსფორმაციის მნიშვნელოვანი ეტაპია და იმისთვის, რომ რაც შეიძლება მეტმა მომხმარებელმა ისარგებლოს ამ სიახლით, საჭიროა სხვა ბანკებიც ჩაერთონ ამ პროცესში. ჩვენ ამ სიახლით არ ვჩერდებით და მომავალში ამ მიმართულებით არაერთ სიახლეს შევთავაზებთ როგორც ფინანსურ სექტორს, ისე ჩვენს მომხმარებლებს“, - აცხადებს არჩილ გაჩეჩილაძე, „საქართველოს ბანკის“ გენერალური დირექტორი.
(R)
