„კოალიცია ცვლილებებისთვის“ ერთ-ერთი ლიდერის, ნიკა მელიას მიმართ თბილისის საქალაქო სასამართლოს მიერ შეფარებულ თავისუფლების აღკვეთას დაცვის მხარე, სააპელაციო სასამართლოში ასაჩივრებს.

როგორც ადვოკატმა ბექა კვინიკაძემ ჟურნალისტებს განუცხადა, დაცვის მხარე მის ხელთ არსებულ ყველა შესაძლებლობას იყენებს, შესაბამისად, დღევანდელი საჩივარიც ამას ემსახურება.

„განაჩენი არის სრულიად დაუსაბუთებელი და უკანონო. ვერ ასაბუთებს იმას, თუ რატომ გამოიყენა ნიკა მელიას შემთხვევაში შეკრებითობა და ასევე, ვერ ასაბუთებს იმას, რატომ გამოიყენა მოცემულ საქმესთან დაკავშირებით ყველაზე მკაცრი სასჯელი, თავისუფლების აღკვეთა. ჩვენს საჩივარში დეტალურად არის მითითებული, თუ რატომ არ უნდა გამოეყენებინა ყველაზე მკაცრი სასჯელი, მათ შორის რატომ იყო უპრეცედენტო განაჩენი შეკრებითობის ნაწილში. გამომდინარე იქიდან, რომ ქვეყანაში არ გაგვაჩნია მართლმსაჯულების ორგანო სააპელაციო სასამართლოსგან არანაირი დადებითი მოლოდინი არ გვაქვს“,- განაცხადა ბექა კვინიკაძემ.

შეგახსენებთ, რომ „კოალიცია ცვლილებისთვის“ ერთ-ერთ ლიდერს ნიკა მელიას დროებით საგამოძიებო კომისიაზე გამოუცხადებლობის საქმეზე 8 თვით თავისუფლების აღკვეთა აქვს მისჯილი, ამასთან, 2 წლის ვადით თანამდებობის დაკავება აეკრძალა.