თბილისში, თვალჭრელიძის ქუჩაზე მდებარე საცხოვრებელ კორპუსთან, საიდანაც მოქალაქეები გამოასახლეს, კომპანიის წარმომადგენელი მივიდა.

როგორც მან ჟურნალისტებს განუცხადა, სურვილის შემთხვევაში, ყველა მოქალაქეს გაესაუბრებიან.

„ვინც გამოთქვამს სურვილს, ყველა ადამიანს ვესაუბრები. ყველა ადამიანთან შემიძლია ვისაუბრო, - განაცხადა მან.

როგორც თვალჭრელიძის ქუჩის ერთ-ერთი მცხოვრები აცხადებს, მას 3 თვეში ქირის სახით მხოლოდ 700 ლარი შესთავაზეს, თუმცა, არავის განუმარტავს, როგორ უნდა იარსებონ მომდევნო თვეების განმავლობაში. მოქალაქეების განცხადებით, გამოსახლებულთა ნაწილმა ღამე ქუჩაში გაათენა.

„ადამიანურად გაგვესაუბრონ, ფართი მოგვცენ. სანამ ბინით დაგვაკმაყოფილებენ, სადმე შეგვიშვან, სახლები მოგვცენ. რომ იწვიმოს და წვიმაში ყოფნა მოგვიწიოს, სად წავიდეთ? კახა კალაძეს ვთხოვ, ადამიანურად დაველაპარაკები ჩვენს გაჭირვებაზე. ქუჩაში რატომ უნდა იყვნენ ეს ადამიანები. გუშინ სიცხიანი ბავშვები იყვნენ, წამალი და სიცხის საზომი არ მიაწოდეს. კაცი ცუდად გახდა და ძლივს სუნთქავდა, გადაიყვანეს, რატომ უნდა ვკვდებოდეთ ჩვენს ქვეყანაში?“,-აცხადებს ერთ-ერთი მოქალაქე „ტვ პირველთან“ საუბრისას.

ცნობისთვის, თბილისში, თვალჭრელიძის ქუჩაზე საცხოვრებელი კორპუსიდან მოსახლეობის გამოსახლების პროცესი გუშინ დაიწყო. ადგილზე მობილიზებულები იყვნენ პოლიციის და აღსრულების ეროვნული ბიუროს წარმომადგენლები. დილიდან საპატრულო პოლიციის წარმომადგენლების გამოჩენას, მოსახლეობის პროტესტი მოჰყვა, ადგილზე ხმაური რამდენჯერმე იყო. როგორც მცხოვრებლები აღნიშნავენ, გამოსახლება კერძო მესაკუთრის საფუძველზე ხდება. ადგილობრივების თქმით, ის აცხადებს, რომ შენობა ავარიულია და უნდა დაცალონ. შინაგან საქმეთა სამინისტროს ცნობით, ადგილზე დღის განმავლობაში 17 პირი დააკავეს.