აშშ-ის პრეზიდენტმა, დონალდ ტრამპმა ვაშინგტონში ეროვნული გვარდიის განთავსების ბრძანება გასცა.

აშშ-ის პრეზიდენტის, დონალდ ტრამპის განცხადებით, „ვაშინგტონის მეტროპოლიტენის პოლიციის დეპარტამენტს ფედერალური კონტროლის ქვეშ მოაქცევს“ და „ვაშინგტონში კანონის, წესრიგისა და საზოგადოებრივი უსაფრთხოების აღდგენის მიზნით ეროვნულ გვარდიას განათავსებს“.

„ვაშინგტონში კანონის, წესრიგისა და საზოგადოებრივი უსაფრთხოების აღსადგენად მე ეროვნულ გვარდიას ვგზავნი. ჩვენი დედაქალაქი ძალადობრივმა ბანდებმა, კრიმინალებმა, მოხეტიალე ახალგაზრდების ბრბოებმა, ნარკოტიკებით გაბრუებულმა მანიაკებმა და უსახლკარო ადამიანებმა ჩაიგდეს ხელში და ჩვენ ამას აღარ დავუშვებთ“, - განაცხადა დონალდ ტრამპმა თეთრ სახლში გამართულ ბრიფინგზე.

მისი თქმით, დასაწყისისთვის ადგილობრივი სამართალდამცავი ორგანოების მხარდასაჭერად ეროვნული გვარდიის 800 წევრს გაგზავნის და ვაშინგტონს „ძალიან სწრაფად გაწმენდს“.