თაზო დათუნაშვილი მოსამართლემ 4000 ლარით დააჯარიმა
კოალიცია „ძლიერი საქართველოს“ ერთ-ერთი ლიდერი, თაზო დათუნაშვილი მოსამართლემ 4000 ლარით დააჯარიმა.
თავად თაზო დათუნაშვილი სხდომას არ ესწრებოდა.
ადვოკატის არჩილ ჭავჭანიძის ინფორმაციით, შინაგან საქმეთა სამინისტრო თაზო დათუნაშვილს წვრილმან ხულიგნობას და საჯარო მოხელის მიმართ შეურაცხყოფას, არასათანადო მოპყრობას ედავებოდა.
საქმე ეხება მათე დევიძის სასამართლო პროცესის შემდეგ მომხდარ ფაქტს. დათუნაშვილი სასამართლოს შენობას ტოვებდა, რა დროსაც ის მანდატურებმა და საპატრულო პოლიციის თანამშრომლებმა ძალის გამოყენებით ტერიტორიიდან გაიყვანეს.
როგორც პარტიაში განმარტავენ, მანამდე, სასამართლოს შენობაში „დათუნაშვილს რამდენიმე მანდატური თავს დაესხა და ფიზიკურად გაუსწორდნენ“.
იურისტები მოითხოვდნენ, აღნიშნულ საქმეზე სამსახურებრივ უფლებამოსილების გადამეტების მუხლით ყოფილიყო გამოძიება დაწყებული.
