აშშ-ის სპეციალური წარმომადგენელის, კიტ კელოგის განცხადებით, პრეზიდენტ დონალდ ტრამპის ადმინისტრაცია ცდილობს, დაასრულოს მკვლელობები და შეაჩეროს რუსეთის ომი უკრაინის წინააღმდეგ.

კიტ კელოგმა კიევში ჟურნალისტებს განუცხადა, რომ დიპლომატიურ ფრონტზე ინტენსიური მუშაობა მიმდინარეობს, რომლის ფარგლებშიც აშშ-ის პრეზიდენტი დონალდ ტრამპი ალასკაში ვლადიმერ პუტინს, ხოლო ვაშინგტონში უკრაინის პრეზიდენტ ვოლოდიმირ ზელენსკის და ევროპელ ლიდერებს შეხვდა.

კელოგმა ხაზი გაუსვა, რომ ომის დასრულება ადვილი საქმე არ არის, მაგრამ დონალდ ტრამპი მშვიდობის პრეზიდენტია და უკრაინაში მკვლელობებისა და ნგრევის დასრულებისკენ მიისწრაფვის.

„ხედავთ სამშვიდობო პროცესს, რომელზეც ჩვენ ვმუშაობთ. ძალიან ბევრს ვმუშაობთ. ვიმედოვნებთ, რომ მოკლევადიან პერსპექტივაში მივაღწევთ ისეთ პოზიციას, სადაც გვექნება უკეთესი, გრძელვადიანი უსაფრთხოების გარანტიები“, - აღნიშნა კელოგმა.

მან იმედი გამოთქვა, რომ ერთ წელიწადში, 2026 წელს, დამოუკიდებლობის დღეს, უკრაინა მსოფლიოში სხვა ქვეყანა იქნება.

„ეს რთული, ძალიან რთული ამოცანაა. პრეზიდენტი ტრამპი ამას აღიარებს. მეც ვაღიარებ. ყველანი ვაღიარებთ ამას. არ მსიამოვნებს ამის თქმა: ომის წარმოება ადვილია, მაგრამ მშვიდობის მიღწევა რთულია. ომის დაწყება ადვილია, მაგრამ ომის შეჩერება ნამდვილად ძალიან რთულია და სწორედ აქ ვართ ახლა“, - აღნიშნა კელოგმა.