აშშ-ის სახელმწიფო მდივანი, მარკო რუბიო ევროპელ და უკრაინელ კოლეგებს უკრაინის უსაფრთხოების გარანტიებთან დაკავშირებით ესაუბრა, - ინფორმაციას CNN-ი სახელმწიფო დეპარტამენტზე დაყრდნობით ავრცელებს.

სახელმწიფო დეპარტამენტის ცნობით, რუბიო და ევროკავშირის, ფინეთის, საფრანგეთის, გერმანიის, იტალიის, პოლონეთის, გაერთიანებული სამეფოს და უკრაინის საგარეო უწყებების ხელმძღვანელები შეთანხმდნენ, რომ გააგრძელებენ თანამშრომლობას დიპლომატიურ ძალისხმევაში, რომლის მიზანი რუსეთ-უკრაინის ომის ხანგრძლივი მოლაპარაკებების გზით დასრულებაა.

CNN-მა გასულ კვირას გაავრცელა ინფორმაცია, რომ რუბიომ ევროპის ქვეყნებიდან ეროვნული უსაფრთხოების საკითხებში მრჩევლებთან ისაუბრა და ხაზი გაუსვა, რომ აშშ მონაწილეობას მიიღებს უკრაინის ომისშემდგომი უსაფრთხოების გარანტიების უზრუნველყოფაში, მაგრამ ტრამპის ადმინისტრაცია მიიჩნევს, რომ ინიციატივა ევროპამ უნდა აიღოს.