პრემიერ-მინისტრის კაბინეტში პირდაპირ მუქარა, შანტაჟი და შეურაცხყოფა მიდიოდა, რომ ქვეყანაში მეორე ფრონტი გაგვეჩაღებინა - იყო დაპირებები: ჩვენ ყველაფრით დაგეხმარებით, შესაბამისი ტექნიკით იქნებით უზრუნველყოფილი და ასე შემდეგ, - ეს განცხადება დღეს, ჟურნალისტებთან თბილისის მერმა და მერობის კანდიდატმა კახა კალაძემ გააკეთა.

კითხვაზე, აქვთ თუ არა ამის დამადასტურებელი მტკიცებულება, კალაძემ განაცხადა: “რა თქმა უნდა, მტკიცებულება არსებობს და თუ საჭიროება და აუცილებლობა იქნება, აუცილებლად იმოქმედებენ“.

„ისევ და ისევ ქვეყნის ინტერესებიდან გამომდინარე, ჯობია ისე იყო, როგორც არის!

მაშანტაჟებ იმით, თითქოს მე ევროპა და ევროკავშირი არ მინდა. მე გეუბნებით, რომ ყველა წინაპირობა, რაც გაწერილია ასოცირების ხელშეკრულებით, შესრულებული მაქვს და იმ ქვეყნებზე წინ ვარ, ვისაც ჩემზე წინ აყენებ - იღებ პოლიტიკურ გადაწყვეტილებას და მე უსამართლოდ მსჯი.

ჩვენ ყველაფერი გაკეთებული გვაქვს - აგერ, გახსენით მოლაპარაკებები და გადაწყვეტილებას დღესვე მივიღებთ!

გინდათ მოლაპარაკებები გახსნათ? - მზად ვართ! გინდათ ევროკავშირში მიგვიღოთ? - მზად ვართ! ისიც გვესმის, რომ ქვეყანა ეკონომიკურად უნდა გაძლიერდეს და წინ წავიდეს, რომ ევროკავშირის სრულფასოვანი წევრი გახდეს. ეს მარტივი არ არის და კარგად გვესმის, მაგრამ რატომ გვაშანტაჟებ ხან კანდიდატის სტატუსით, ხან მოლაპარაკებების გახსნით და ახლა უკვე ვიზალიბერალიზაციით?!

კანდიდატის სტატუსის თემამ ვერ გაჭრა და რევოლუცია ვერ მოაწყვეთ! მოლაპარაკებების გახსნა-არ გახსნის თემამ ვერ გაჭრა და რევოლუცია ვერ მოაწყვეთ! ახლა ვიზალიბერალიზაციით ცდილობთ და მანდაც დამარცხდებით.

რადიკალიზმი, ბოროტება და აგენტურა ყოველთვის განწირულია მარცხისთვის“, - განაცხადა თბილისის მერმა კახა კალაძემ.