ევროკავშირისა და წევრი ქვეყნების 206 ყოფილი ელჩი და დიპლომატიური კორპუსის უფროსი თანამშრომელი საჯარო წერილს ავრცელებს და ბლოკს ღაზაში მიმდინარე ომსა და ისრაელის მიერ დასავლეთ სანაპიროზე განხორციელებულ ქმედებებთან დაკავშირებით სასწრაფო ზომების მიღებისკენ მოუწოდებს.

წერილში აღნიშნულია, რომ თუ ევროკავშირი კოლექტიურად არ იმოქმედებს, წევრმა სახელმწიფოებმა ინდივიდუალურად ან მცირე ჯგუფებად უნდა გადადგან ნაბიჯები ადამიანის უფლებების მხარდასაჭერად და საერთაშორისო სამართლის დასაცავად.

დიპლომატები და ყოფილი დიპლომატები მიიჩნევენ, რომ ეს ზომები მოიცავს იარაღის ექსპორტის ლიცენზიების შეჩერებას, უკანონო დასახლებებთან საქონლისა და მომსახურების ვაჭრობის აკრძალვას და ევროპული მონაცემთა ცენტრებისთვის ისრაელის მთავრობისგან ან კომერციული წყაროებიდან მონაცემების მიღების, შენახვის ან დამუშავების აკრძალვას, თუ ეს ეხება ისრაელის „ღაზაში და ოკუპირებული ტერიტორიების სხვა ადგილებში ყოფნასა და საქმიანობას“.

„დღევანდელი ვითარება ღაზასა და დასავლეთ სანაპიროზე უპრეცედენტოა. ჩვენი კიდევ ერთი და სასწრაფო მოწოდება მოქმედებისკენ ასახავს ჩვენს ღრმა შეშფოთებას ისრაელის მთავრობის მიერ პალესტინელი ხალხის წინააღმდეგ ყოველდღიურად ჩადენილი გაუმართლებელი შურისძიებისა და ჰუმანიტარული და ადამიანის უფლებების სამართლის საშინელი დარღვევების გამო. ხაზგასმით აღვნიშნავთ, რომ ევროკავშირის მრავალი ამჟამინდელი თანამშრომლის მიერ გამოთქმული შეხედულებების ანალოგიურად, სახელმწიფოებმა და ინსტიტუტებმა, რომლებიც აცხადებენ, რომ მხარს უჭერენ ადამიანის უფლებებს და იცავენ საერთაშორისო სამართალს, უნდა მისცენ მაგალითი არა მხოლოდ სიტყვებით, არამედ მოქმედებით“, - აღნიშნულია წერილში.