საზღვაო ტრანსპორტის სააგენტოს ყოფილი ხელმძღვანელის, ალექსი ახვლედიანის ინფორმაციით, თურქეთის კლინიკაში, აჭარის მთავრობის ყოფილს ხელმძღვანელთან, თორნიკე რიჟვაძესთან კონტაქტი ოჯახის წევრებისთვისაც შეზღუდულია.

როგორც მან ჟურნალისტებს განუცხადა, რიჟვაძეს ფსიქოლოგებმა „მკაცრი ფსიქოლოგიური მკურნალობა დაუნიშნეს“.

ამასთან, მისივე ინფორმაციით, თორნიკე რიჟვაძეს, უახლოეს დღეებში თვალის ქირურგიული ოპერაცია უნდა ჩაუტარდეს, რა პრობლემაც მას ამ შემთხვევამდეც ჰქონდა.

„მასთან კომუნიკაცია ოჯახის წევრებისთვისაც საკმაოდ შეზღუდულია, იმიტომ რომ როგორც მე მაქვს ინფორმაცია ოჯახიდან, დაუნიშნეს ორთვიანი საკმაოდ მკაცრი ფსიქოლოგიური მკურნალობა. მხოლოდ ცოტა ხნით ბავშვებს აქვთ შესვლის უფლება. ტელეფონი და რაიმე მსგავსი მას არ აქვს. ბოლო, გუშინწინდელი ინფორმაციით, ალბათ კვირის ბოლოს, თურქეთშივე გაუკეთებენ თვალის ოპერაციას. მას ეს პრობლემა ჰქონდა და გამწვავება გამოიწვია.

მას იქ ადგილობრივი ფსიქოლოგების ჯგუფი ემსახურება და აუკრძალეს ამ ორთვიანი კურსის დასრულებამდე, საერთოდ ყველანაირი კომუნიკაცია ყველასთან. მე მხოლოდ ოჯახის წევრებს ვეკონტაქტები“,- განაცხადა ახვლედიანმა.