პრეზიდენტის ადმინისტრაციის ხელმძღვანელი ანდრეი ერმაკი და ეროვნული უსაფრთხოებისა და თავდაცვის საბჭოს მდივანი რუსტემ უმეროვი პარასკევს, დონალდ ტრამპის გუნდთან შეხვედრაზე უსაფრთხოების გარანტიებზე ისაუბრებენ, - ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა.

„ხუთშაბათს - შეხვედრები შვეიცარიაში. პარასკევს - ამერიკის შეერთებულ შტატებში, ნიუ-იორკში, შეხვედრები პრეზიდენტ ტრამპის გუნდთან. ჩართული იქნება ყველა, ვინც უსაფრთხოების გარანტიების შინაარსზე მუშაობს - უსაფრთხოების გარანტიების სამხედრო, პოლიტიკურ, ეკონომიკურ კომპონენტებზე. ამოცანაა, რაც შეიძლება დაჩქარდეს, რათა ეს ასევე იყოს ბერკეტი - გავლენის ბერკეტი: რუსებმა უნდა დაინახონ, რამდენად სერიოზულია მსოფლიო და რამდენად ცუდი შედეგები მოჰყვება რუსეთისთვის, თუ ომი გაგრძელდება“, - აღნიშნა ზელენსკიმ.

მისი თქმით, ყველა ხედავს მოსკოვის მხრიდან ძალიან თავხედურ ნეგატიურ სიგნალებს მოლაპარაკებებთან დაკავშირებით.

„რუსები არ აპირებენ შეასრულონ ის, რისი დაპირებაც გასცეს“, - განაცხადა ზელენსკიმ და დასძინა, რომ საჭიროა რუსეთზე ზეწოლის გაზრდა.