კიევის დარნიცკის რაიონში, საცხოვრებელ კორპუსზე რუსული დარტყმის ადგილზე სამაშველო ოპერაციები დასრულდა და დანგრეული შენობების დემონტაჟი გრძელდება, 8 ადამიანის ბედი უცნობია, - ინფორმაციას უკრაინული მედია ქვეყნის პრეზიდენტზე, ვოლოდიმირ ზელენსკიზე დაყრდნობით ავრცელებს.

„კიევის დარნიცკის რაიონში, საცხოვრებელ კორპუსზე რუსეთის მიერ განხორციელებული დარტყმის ადგილზე სამაშველო სამუშაოები დასრულდა. დანგრეული შენობების დემონტაჟი გრძელდება. ამ დროისთვის, მხოლოდ ამ ერთი დარტყმის ადგილას 22 ადამიანი დაიღუპა, მათ შორის 4 ბავშვი. ყველაზე პატარა გოგონა 3 წლისაც არ არის“, - აღნიშნა ზელენსკიმ.

მისი თქმით, დედაქალაქზე თავდასხმას სულ 23 ადამიანის სიცოცხლე ემსხვერპლა, 53 მცხოვრები კი - დაშავდა.

„8 ადამიანის ბედი ამ დრომდე უცნობია“, - აღნიშნა ზელენსკიმ.