ავღანეთში მიწისძვრის შედეგად დაღუპულთა რიცხვი 1 124-მდე გაიზარდა, - ინფორმაციას Reuters-ი ავღანეთის წითელი ნახევარმთვარის საზოგადოებაზე დაყრდნობით ავრცელებს.

ორგანიზაციის ცნობით, მიწისძვრის შედეგად, სულ მცირე, 1 124 ადამიანი დაიღუპა, 3 251 დაშავდა და 8 000-ზე მეტი სახლი განადგურდა. წითელი ნახევარმთვარის საზოგადოებაში აცხადებენ, რომ ნანგრევების ქვეშ, შესაძლოა, კიდევ უფრო მეტი ადამიანი იყოს მოყოლილი.

ავღანეთში გაეროს კოორდინატორის განცხადებით, მსხვერპლის რიცხვი, სავარაუდოდ, გაიზრდება.

შეგახსენებთ, ავღანეთში 6 მაგნიტუდის სიმძლავრის მიწისძვრა ორშაბათს, ადგილობრივი დროით შუაღამისას მოხდა, ყველაზე მეტად კუნარისა და ნანგარჰარის პროვინციები დაზარალდა.