ჩვენთვის მნიშვნელოვანია ყველამ იცოდეს, რომ რუსულ სპეცოპერაციაში არ შევდივართ და ასევე, საზოგადოებას მოვუწოდებთ, რომ 4 ოქტომბერს, არჩევნების ნაცვლად,4 საათზე მოვიდნენ რუსთაველის გამზირზე, - ამის შესახებ განაცხადა „ნაციონალური მოძრაობის“ რეგიონულმა მდივანმა, გიორგი ბოტკოველმა.

როგორც ის განმარტავს, ხელისუფლება ადამიანების მოტყუებით არის დაკავებული.

„გარდა იმისა, რომ რეჟიმი სისტემატურად დაკავებულია ადამიანების ჩაგვრით, პოლიტიკური ნიშნით აკავებს, მარნეულში ვიმყოფებით, სადაც კიდევ ერთი ნათელი ფაქტი აღმოჩნდა - რეჟიმი მიმართავს მაქინაციებს, სხვადასხვა ხერხით ცდილობს აზერბაიჯანული თემის წარმომადგენლები მოატყუოს. ადამიანებს ატყუებენ თითქოს, 5 ნომერი, რომელიც „ნაციონალური მოძრაობის” საარჩევნო ნომერი აღარ არის, თითქოს, ისევ „ნაციონალური მოძრაობისაა“. ჩვენ ამ სპეცოპერაციაში მონაწილეობას არ ვიღებთ, ამიტომ მნიშვნელოვანია, 4 ოქტომბერს ქვეყნის მთავარ გამზირზე, პარლამენტის წინ ვიდგეთ, სადაც დარწმუნებული ვარ, ძალიან ბევრი ადამიანი იქნება, მათ შორის, მარნეულიდან“, - განაცხადა გიორგი ბოტკოველმა.

„მიხეილ სააკაშვილის პარტია - „ერთიანი ნაციონალური მოძრაობა“ რუსულ სპეცოპერაციაში მონაწილეობას არ იღებს! „ერთიანი ნაციონალური მოძრაობა“ 4 ოქტომბერს რუსთაველის გამზირზე იკრიბება. 4 ოქტომბერთან დაკავშირებით, საინფორმაციო კამპანია გრძელდება, „ერთიანი ნაციონალური მოძრაობის“ გენერალური მდივანი, პეტრე ცისკარიშვილი და „ერთიანი ნაციონალური მოძრაობის“ რეგიონული მდივანი გიორგი ბოტკოველი, პარტიის წევრთან, ჯეიჰუნ მუჰამედალისთან ერთად, ქვემო ქართლში, კერძოდ მარნეულში იმყოფებოდნენ, სადაც მათ 4 ოქტომბერთან დაკავშირებით საინფორმაციო ბუკლეტები დაარიგეს და მოსახლეობას 4 ოქტომბერს რუსთაველის გამზირზე შეკრებისკენ მოუწოდეს“, - ნათქვამია პარტიის ინფორმაციაში.