საქართველოს გენერალური პროკურორი გიორგი გვარაკიძე სინგაპურში, პროკურორთა საერთაშორისო ასოციაციის (IAP) 30-ე წლიური კონფერენციის ფარგლებში, ინგლისის და უელსის მთავარ პროკურორს სტივენ პარკინსონს შეხვდა. ინფორმაციას საქართველოს გენერალური პროკურატურა ავრცელებს.

მათივე ცნობით, ორმხრივ შეხვედრაზე მხარეებმა ორ ქვეყანას შორის სამართლებრივ ურთიერთობებზე იმსჯელეს, სამომავლო თანამშრომლობის მნიშვნელოვანი მიმართულებები განიხილეს და სამომავლოდ მისი გაღრმავების თაობაზე მზაობა გამოხატეს.

„სინგაპურის რესპუბლიკაში ორმხრივ შეხვედრას გენერალური პროკურორის მოადგილე ამირან გულუაშვილი, საქართველოს გენერალური პროკურატურის სამართლებრივი უზრუნველყოფისა და საერთაშორისო ურთიერთობების დეპარტამენტის უფროსი გიორგი მიქავა, ადმინისტრაციის უფროსის მოვალეობის შემსრულებელი ბიძინა ქუმსიაშვილი და ინგლისის და უელსის მთავარი პროკურატურის წარმომადგენლები - ინგლისის და უელსის გენერალური სამართლებრივი უზრუნველყოფის დირექტორი გრეის ონონივუ, ინგლისის და უელსის ეკონომიკური დანაშაულის, ორგანიზებული დანაშაულის და საერთაშორისო დირექტორატის მთავარი პროკურორი ადრიან ფოსტერი და ინგლისის და უელსის მთავარი პროკურორის აპარატის უფროსი ჰარვი პალმერი ესწრებოდნენ.

სინგაპურის რესპუბლიკაში პროკურორთა საერთაშორისო ასოციაციის (IAP) 30-ე კონფერენციის სესია მიმდინარეობს. პროკურორთა საერთაშორისო ასოციაცია (IAP) მსოფლიოს 180 ქვეყნის 183-ზე მეტი უწყებას, ასევე ინდივიდუალურ წევრ პროკურორებს აერთიანებს“, - აღნიშნულია ინფორმაციაში.