რუსეთმა ბელარუსთან ერთობლივი სამხედრო წვრთნების - „ზაპად 2025“-ის - ფარგლებში, ბარენცის ზღვაში მდებარე პირობითი სამიზნის მიმართულებით ჰიპერბგერითი ფრთოსანი რაკეტა „ცირკონი“ გაუშვა, - ინფორმაციას რუსეთის თავდაცვის სამინისტრო ავრცელებს.

უწყების ცნობით, „ცირკონის“ პრაქტიკული გაშვება ფრეგატ „ადმირალ გოლოვკოს“ ეკიპაჟმა განახორციელა.

„რეალურ დროში მიღებული ობიექტური კონტროლის მონაცემების თანახმად, სამიზნე პირდაპირი დარტყმის შედეგად განადგურდა“, - აცხადებენ უწყებაში.

რუსეთ-ბელარუსის ერთობლივი წვრთნები - „ზაპად 2025“ - 12 სექტემბერს დაიწყო. მოსკოვი და მინსკი აცხადებენ, რომ წვრთნები წმინდა თავდაცვითი ხასიათისაა და რომელიმე ქვეყანაზე თავდასხმას არ ითვალისწინებს. წვრთნები 16 სექტემბრამდე გაგრძელდება.