ყირიმის საერთაშორისო პლატფორმის მეხუთე სამიტი 24 სექტემბერს, ნიუ-იორკში, გაერო-ს შტაბ-ბინაში გაიმართება, - ამის შესახებ უკრაინის საგარეო საქმეთა მინისტრმა, ანდრეი სიბიგამ განაცხადა.

მისი თქმით, სამიტი, რომელიც გაეროს 80 წლის იუბილესთან დაკავშირებით გაიმართება, კიდევ ერთხელ დაადასტურებს გლობალურ ერთგულებას გაერო-ს წესდების მიზნებისა და პრინციპების მიმართ - სახელმწიფოების სუვერენიტეტის, ტერიტორიული მთლიანობისა და მშვიდობის მიმართ.

„სამიტი კიდევ ერთხელ დაადასტურებს გაერო-ს გენერალური ასამბლეის მტკიცე პოზიციას გაერო-ს წესდების დაცვასთან დაკავშირებით რუსეთის აგრესიისა და უკრაინის ტერიტორიის ანექსიის მცდელობის კონტექსტში. 2014 წლიდან ასამბლეამ ოცზე მეტი რეზოლუცია მიიღო, რომლებიც კიდევ ერთხელ ადასტურებენ, რომ ყირიმი უკრაინის ნაწილია“, - აღნიშნა სიბიგამ.

მისი თქმით, უკრაინა მოუწოდებს გაერო-ს ყველა მშვიდობისმოყვარე წევრ სახელმწიფოს, შეუერთდნენ სამიტს, დაიცვან გაერო-ს ქარტია და ხელი შეუწყონ სამართლიან და მდგრად მშვიდობას უკრაინაში.

ყირიმის პლატფორმის წინა სამიტი 2024 წლის 11 სექტემბერს, კიევში გაიმართა.