არჩევნებამდე ორი კვირაა დარჩენილი და ამ დროს ზოგი ამერიკაშია, ზოგი ბრიუსელშია, ზოგი ბერლინშია. მერე რომ ვამბობთ, რომ უცხოურ ინტერესებს ატარებენ, უკვირთ, - ამის შესახებ პრემიერ-მინისტრმა, ირაკლი კობახიძემ მედიასთან განაცხადა, რითაც ოპოზიციონერი პოლიტიკოსების ბრიუსელსა და ვაშინგტონში ვიზიტს ეხმაურება.

პრემიერის განცხადებით, ოპოზიციონერი პოლიტიკოსები არიან ორიენტირებული არა საკუთარ ხალხზე, არამედ უცხოელ ჩინოვნიკებზე.

„თავადაც შეგიძლიათ იმსჯელოთ, ვის ინტერესებს ატარებენ ეს ადამიანი. ვის ინტერესებს ეყრდნობიან, ვის მხარდაჭერას ეყრდნობიან ეს ადამიანები. ეს არ არის ქართველი ხალხი, ესენი არიან ბიუროკრატები სხვადასხვა დედაქალაქში, ამიტომ აგებენ. როდესაც შენ ორიენტირებული ხარ, არა საკუთარ ხალხზე, არამედ ვიღაც ჩინოვნიკებზე ამა თუ იმ კაბინეტსა და დედაქალაქში, რა თქმა უნდა, ყველა არჩევნებს წააგებ“, - განაცხადა ირაკლი კობახიძემ.

პრემიერის განცხადებით, „ნაციონალური მოძრაობის“ ლიდერების კონგრესმენ ჯო უილსონთან (რესპუბლიკური პარტია) შეხვედრა საინტერესო არ არის, რადგან ისინი „დიფ-სთეითის“ აგენტები არიან.

„საინტერესო არ არის, ბოლოს გაირკვა, რომ 2012 წლამდე არსებულ პროექტზე საუბრობდნენ, რომელიც არ განხორციელდა. საინტერესო არ არის, ჯო უილსონი და „ნაციონალური მოძრაობა“ ერთი ხაზია, ისინი არიან „დიფ სთეითის“ აგენტები, შესაბამისად მათი ერთმანეთთან შეხვედრა, შიდაპარტიული შეხვედრა იყო, რომელიც, შესაბამისად ჩვენთვის საინტერესო ვერ იქნება“, - განაცხადა ირაკლი კობახიძემ.