300 დღეა ქართველი ხალხი დგას ქუჩაში და აჩვენებს უპრეცედენტო ნებას და წინააღმდეგობას რეჟიმის მიმართ. ყველაზე მეტად რაც მე მაშინებს, არის ის, რომ ამ 300 დღეს დაუწესო ბოლო ვადა, - ამის შესახებ მოძრაობა “სოციალური დემოკრატიის“ წევრმა, ვახუშტი მენაბდემ 4 ოქტომბერს დაგეგმილ აქციაზე საუბრისას განაცხადა.

როგორც ვახუშტი მენაბდემ „პალიტრანიუსის“ გადაცემაში „360 გრადუსი“ აღნიშნა, უბრალოდ ბევრი ხალხი ქუჩაში, ასი ათასი კაცი ქუჩაში, არ არის საკმარისი იმისთვის, რომ რეჟიმმა დათმოს ძალაუფლება და საჭიროა გრძელვადიანი პროტესტი.

„ნებისმიერ თარიღს ჩვენ უნდა შევხედოთ, როგორც ბრძოლის მონაკვეთს, როგორც ბრძოლის მომდევნო დღეს. ეს იქნება ხვალინდელი დღე, 4 ოქტომბერი თუ ნებისმიერი დღე, ქართველი ხალხი გამოვა და საკუთარ პოზიციას დააფიქსირებს. ზოგჯერ არის შედარებით ნაკლები რაოდენობის ხალხი, ზოგჯერ არის ბევრი ხალხი. ყველა დღე, როცა ბევრი ხალხი გამოდის, ეს არის ძალიან კარგი.

4 ოქტომბერს რომ ვერ დამთავრდეს, საზოგადოებას, რომელიც 300 დღეა პროტესტშია ჩართული, არ უნდა ვუთხრათ ჩვენ ის, რომ 5 ოქტომბერს პროტესტი არ უნდა გააგრძელოს. მნიშვნელოვანია, რომ პროტესტი გაგრძელდეს 5-ში, 6-ში, 7-ში და ა.შ. თუ „ქართული ოცნება“ 7 ოქტომბერს არ გაითვალისწინებს ქართველი ხალხის მოთხოვნას, ქართველი ხალხი გააგრძელებს პროტესტ 8-ში, თუ 8-ში არ გაითვალისწინებს, გავაგრძელებთ 9-ში და ა.შ. ჩვენ გვჭირდება გრძელვადიანი პროტესტი.

დეკემბერში ჩვენ დავინახეთ, რომ უბრალოდ ბევრი ხალხი ქუჩაში, ასი ათასი კაცი ქუჩაში, არ არის საკმარისი იმისთვის, რომ რეჟიმმა დათმოს ძალაუფლება. შეიძლება 20-30 წლის წინ ამაზე ნაკლები ადამიანების რაოდენობა ყოფილიყო საკმარისი, მაგრამ ახლა სისტემა და ლოგიკა შეიცვალა. ახლა მარტო ქუჩაში ბევრი ხალხი საკმარისი არ არის. ჩვენ გვჭირდება პროტესტის განვრცობა საზოგადოების უფრო და უფრო მეტ ჯგუფებზე. მხოლოდ და მხოლოდ ასეა შესაძლებელი რეჟიმის დამარცხება“, - განაცხადა ვახუშტი მენაბდემ.

ვახუშტი მენაბდის განმარტებით, პროტესტისთვის ყველაზე დიდი საფრთხე იმედგაცრუებაა.

„ვინც, რაღაც სცენარებს ჰპირდება საზოგადოებას, რომელიც ერთ-ორ პოლიტიკურ ლიდერზე ან ერთ პოლიტიკურ ჯგუფზეა ჩამოკიდებული, ისინი საფრთხეს უქმნიან ჰორიზონტალურობას და წინააღმდეგობას. ყველაზე დიდი საფრთხე არის იმედგაცრუება. იმედგაცრუება მოდის იმედებიდან, რომელიც გაცრუვდება იმ შემთხვევაში, თუ სცენარი კარგად გათვლილი არ არის. ჩვენ იმედებს კი არ უნდა დავაყრდნოთ საკუთარი პოლიტიკური მოქმედებები, არამედ გეგმებს და უსამართლობის განცდას“, - განაცხადა ვახუშტი მენაბდემ.