გელა უძილაურს დაკავების მომენტში წინააღმდეგობა არ გაუწევია - ჩხრეკა დაკავების ადგილზე ჩატარდა, რა დროსაც, ამოღებულ იქნა იარაღი და რამდენიმე მჭიდი, რომელშიც ვაზნები იყო მოთავსებული,- ამის შესახებ ბიზნესმენ ლევან ჯანგველაძის მკვლელობისა და მისი მძღოლის, გია ჩადუნელის მკვლელობის მცდელობის ფაქტზე ბრალდებული გელა უძილაურის საქმის ერთ-ერთმა გამომძიებელმა, ვიქტორ მახარაძემ განაცხადა.

გამომძიებლის მიერ სასამართლოში დაკითხვის დროს გაჟღერებული ინფორმაციის თანახმად, გელა უძილაურის ჩხრეკის დროს, გამომძიებლებმა GLOCK ტიპის იარაღი, მჭიდთან ერთად ამოიღეს, რომელშიც 15 ვაზნა იყო მოთავსებული, ასევე ბრალდებულის ჩანთის ჩხრეკისას კიდევ 3 მჭიდი იქნა ნაპოვნი, საიდანაც 2-ში 17 ვაზნა, ხოლო მე-3 მჭიდში 1 ვაზნა იყო მოთავსებული.

„როდესაც, შეტყობინება შემოვიდა, რომ ჭავჭავაძეზე მკვლელობა მოხდა, 10 გამომძიებელი გავედით ადგილზე. მე ძირითადი გამომძიებელი არ ვარ, მაგრამ აღნიშნული საქმის მთავარი გამომძიებლის დავალებით, 14 მარტს მომხდარ მკვლელობასთან დაკავშირებით, ფაქტის შემსწრე პირები გამოვკითხე.

ასევე, მე მოვახდინე დაკავების დღეს გელა უძილაურის პირადი ჩხრეკა და დაკავება. ოპერატიული ინფორმაცია მივიღეთ, რომ ის ბერიაშვილის ქუჩაზე იმყოფებოდა. მას წინააღმდეგობა არ გაუწევია. ჩხრეკა დაკავების ადგილზე ჩატარდა, რა დროსაც, ამოღებულ იქნა იარაღი და რამდენიმე მჭიდი, რომელშიც ვაზნები იყო მოთავსებული. ასევე, მისი ტანსაცმელი და პირადი ჰიგიენის საშუალებები. ასევე, ფულადი თანხაც",- განაცხადა ვიქტორ მახარაძემ.

ცნობისთვის, ლევან ჯანგველაძის მკვლელობის ბრალდებით გელა უძილაურია დაკავებული.

შემთხვევა 2025 წლის 14 მარტს 23:30 საათზე თბილისში, ილია ჭავჭავაძის გამზირზე მოხდა.

პროკურატურის ინფორმაციით, უძილაურმა ხალხმრავალ ადგილზე ცეცხლსასროლი იარაღიდან რამდენჯერმე ესროლა ლევან ჯანგველაძეს და მის მძღოლს გია ჩადუნელს. მიღებული მრავლობითი დაზიანების შედეგად ჯანგველაძე შემთხვევის ადგილზე გარდაიცვალა, ხოლო ჩადუნელი ცეცხლსასროლი იარაღიდან მიყენებული ჭრილობებით საავადმყოფოში გადაიყვანეს.

გელა უძილაურს ბრალდება საქართველოს სისხლის სამართლის კოდექსის 19.109-ე მუხლის „ბ“ და „ლ“ ქვეპუნქტებით (განზრახ მკვლელობის მცდელობა ჩადენილი ორის პირის მიმართ, ისეთი საშუალებით რომელიც საფრთხეს უქმნის სხვათა სიცოცხლეს და ჯანმრთელობას) და 236-ე მუხლის მესამე და მეოთხე ნაწილებით (ცეცხლსასროლი იარაღის მართლსაწინააღმდეგო შეძენა, შენახვა, ტარება) წარედგინა, რაც სასჯელის სახედ და ზომად 16 დან 20 წლამდე, ან უვადოდ თავისუფლების აღკვეთას ითვალისწინებს.