ალეკო ელისაშვილს წამოსცდა, რომ როდესაც კუპრაძე გახდება დედაქალაქის მერი, ამის შემდეგ უნდა დაიწყოს მერიამ გაფიცვა, ანუ მერი და მერია თავის თავს უნდა გაეფიცოს - საოცრებაა, - ამის შესახებ საქართველოს პრემიერ-მინისტრმა ირაკლი კობახიძემ ჟურნალისტებს თელავში განუცხადა.

პრემიერ-მინისტრის თქმით, ყველაფერი მეტყველებს ოპოზიციაში არსებულ მძიმე მდგომარეობაზე.

„ყველა ერთი პოლიტიკური ძალაა სინამდვილეში. მათ ჰყავთ ერთი პატრონი და ისინი მოქმედებენ სწორედ გარე დავალებით, რადიკალური სცენარების შესაბამისად. რაც შეეხება ალეკო ელისაშვილს, მას წამოსცდა, რასაც ფიქრობდა, მერე კუპრაძემ სცადა ამის გასწორება, თუმცა ვეღარც გაასწორა. საუბარი იყო იმაზე, რომ როდესაც კუპრაძე უნდა გახდეს დედაქალაქის მერი, ამის შემდეგ უნდა დაიწყოს მერიამ გაფიცვა, ანუ მერი და მერია თავის თავს უნდა გაეფიცოს. საოცრებაა, რაზეც ლაპარაკობენ. ეს ყველაფერი მეტყველებს ოპოზიციაში არსებულ მძიმე მდგომარეობაზე როგორც ფსიქოლოგიურ, ისე ფიზიოლოგიურ მდგომარეობაზე, როგორიც არის დღეს ოპოზიციაში ჩამოყალიბებული",-განაცხადა პრემიერმა.

ასევე, პრემიერ-მინისტრმა ისაუბრა „ლელო-ძლიერი საქართველოს“ ბოლნისის მერობის კანდიდატზეც, რომელმაც კანდიდატურა სწორედ „ქართული ოცნების“ სასარგებლოდ მოხსნა. კობახიძე აცხადებს, რომ ვიდრე ბოლნისის მერობის კანდიდატი დატოვებდა „ლელოს", მანამდე მთელი ხელმძღვანელობა გავიდა პარტიიდან, რაც, მისი თქმით, „აბსოლუტურად ლოგიკური მდგომარეობაა”, სადამდეც „ლელომ“ და „ოპოზიციურმა რადიკალურმა პარტიებმა“ საკუთარი თავი მიიყვანეს.

„ვიდრე ბოლნისის მერობის კანდიდატი დატოვებდა „ლელოს", მანამდე მთელი „ლიდერშიპი", თუ შეიძლება „ლიდერშიპი" ჰყავდეს „ლელოს", არ ვიცი, მთელი ხელმძღვანელობა გავიდა პარტიიდან. საბა ბუაძეც სუს-ს გაუყვანია „ლელოდან" და კიდევ არაერთი სხვა ლიდერი იყო. რა თქმა უნდა, ხედავენ, რომ პარტია ეშლებათ, ვიღაცას უნდა გადააბრალონ და ამ შემთხვევაში აირჩიეს სუს-ი. ყველა ხედავს, რომ პარტია ეშლებათ, ხელმძღვანელი თანამდებობის პირებიც ტოვებენ პარტიას, იქ რეგიონული კანდიდატები ტოვებენ. ეს არის აბსოლუტურად ლოგიკური მდგომარეობა, სადამდეც ამ პარტიამ და ზოგადად, ოპოზიციურმა რადიკალურმა პარტიებმა მიიყვანეს საკუთარი თავი", - განაცხადა პრემიერმა.