კომპანია B.P. TRANS-ის დირექტორის, სუს-ის მიერ დაკავებულ ვალერიან კვარაცხელიას ადვოკატის თეონა გვაზავას განცხადებით, მისი დაცვის ქვეშ მყოფი კომპანიის დირექტორის პოზიციას იკავებს 2021 წლის 10 აგვისტოდან, რაც ნიშნავს, რომ გარკვეული სახის სადავო ქმედებები განხორციელებულია ჯერ კიდევ იქამდე, სანამ ის უფლებამოსილი პირი გახდებოდა.

მისი თქმით, ვალერიან კვარაცხელია დუმილის უფლებას იყენებს.

„ბრალდების წარდგენის შემდეგ ჩვენება არ დაფიქსირებული, ვინაიდან იყენებს კანონით გათვალისწინებულ დუმილის უფლება. ტენდერი გამოცხადდა 2020 წლის 6 ნოემბერს, შესაბამისად ხელშეკრულება სახელმწიფოსთან, შესაბამის დაწესებულებასთან გაფორმებულია 2020 წლის 19 დეკემბერს. ჩემი დაცვის ქვეშ მყოფი დირექტორის პოზიციას იკავებს 2021 წლის 10 აგვისტოდა, რაც ნიშნავს, რომ გარკვეული სახის ქმედებები განხორციელებულია ჯერ კიდევ მანამ, სანამ ის გახდებოდა უფლებამოსილი პირი.

სამუშაოები ჩაბარებულია კეთილსინდისიერად, რიცხობრივად შეესაბამება იმ სტანდარტებს, რაც დადგენილი იყო სახელმწიფო შესყიდვის პირობებში“, - განაცხადა გვაზავამ.

კითხვაზე, რას ედავებიან ოფიციალურად მისი დაცვის ქვეშ მყოფს, გვაზავამ უპასუხა, რომ „ოფიციალურად ედავებიან ჯგუფურად დიდი ოდენობით თაღლითობაში დახმარებას და დოკუმენტის გაყალბებას, რომელმაც დიდი ზიანი გამოიწვია“.

შეგახსენებთ, საქმე ეხება საქართველოს რეგიონული განვითარებისა და ინფრასტრუქტურის სამინისტროს კუთვნილი 4 184 249 ლარის თაღლითურად დაუფლების ფაქტს.

აღნიშნულზე დაკავებულია შპს B.P. TRANS - ის დირექტორი ვ.კ. ამავე კომპანიის თანამშრომელი ი.ჭ. და საზედამხედველო კომპანიის სამი თანამშრომელი, ხოლო რაც შეეხება შპს B.P. TRANS -ის ყოფილ დირექტორს, 100%-იანი წილის მფლობელსა და ამავე დროს ვანში „ქართული ოცნების“ საკრებულოს წევრს, ბიჭიკო პაიკიძეს, ის მიმალვაშია.

სუს-ის ინფორმაციით, ჩატარებული გამოძიებით დადგენილია, რომ 2021 წლის ივნისიდან 2022 წლის სექტემბრის ჩათვლით, ელექტრონული ტენდერით გათვალისწინებული სამუშაოების შესრულების პროცესში, ქუთაისი-ალპანა-მამისონის უღელტეხილის საავტომობილო გზის მონაკვეთის და ონის მუნიციპალიტეტის არეალში სტიქიის შედეგად დაზიანებული, ცალკეული მონაკვეთების ნაპირდამცავი ქვაყრილის ლოდებით მოწყობის სამუშაოების განხორციელებისას, შპს „B.P. TRANS“-ის 100%-ანი წილის მფლობელი ბიჭიკო პაიკიძე, ამავე კომპანიის დირექტორ ვ.კ-ს, კომპანიის თანამშრომელ ი.ჭ-ს და ხელშეკრულების შესრულების ზედამხედველი პირების გ.კ-ს, რ.ფ-ს და ი.გ-ს დახმარებით, მოტყუებით დაეუფლა საქართველოს რეგიონული განვითარებისა და ინფრასტრუქტურის სამინისტროს კუთვნილ 4 184 249 ლარს, რითაც სახელმწიფოს მიადგა დიდი ოდენობით ქონებრივი ზიანი.

დაკავებულებსა და პაიკიძეს ედავებიან საქართველოს სისხლის სამართლის კოდექსის 180-ე მუხლის მე-3 ნაწილის „ბ“ ქვეპუნქტით და 25, 180-ე მუხლის მე-3 ნაწილის „ბ“ ქვეპუნქტით გათვალისწინებულ ქმედებას, რაც სასჯელის სახედ და ზომად ითვალისწინებს თავისუფლების აღკვეთას 6-დან 9 წლამდე ვადით.