განათლების, მეცნიერებისა და ახალგაზრდობის მინისტრის, გივი მიქანაძის განცხადებით, მიხეილ ყაველაშვილის შეხვედრები მათ შორის გაეროს გენერალურ მდივანთან, უპირველეს ყოვლისა უკავშირდებოდა საქართველოს ტერიტორიული მთლიანობის აღდგენასთან დაკავშირებულ საკითხებს.

როგორც მან ჟურნალისტებს მიხეილ ყაველაშვილის გაეროს გენერალურ ასამბლეაზე გაკეთებული განცხადებების შეფასებისას უთხრა, საქართველოს უმთავრესი გამოწვევა ტერიტორიული მთლიანობის აღდგენა და სიღარიბის დაძლევაა.

„ჩვენ ყველა ტრიბუნას მაქსიმალურად ვიყენებთ იმისთვის, რომ დავაფიქსიროთ ის მდგომარეობა, რაც ოკუპაციასთან არის დაკავშირებული. ჩვენ მუდმივ რეჟიმში ვთანამშრომლობთ ჩვენს საერთაშორისო პარტნიორებთან სამშვიდობო გზით დეოკუპაციის მიზნით. მიხეილ ყაველაშვილის არაერთი შეხვედრა, მათ შორის გაეროს გენერალურ მდივანთან თუ სხვა წარმომადგენლებთან, უპირველეს ყოვლისა უკავშირდება დეოკუპაციის საკითხებს, საქართველოს ტერიტორიული მთლიანობის აღდგენასთან დაკავშირებულ საკითხებს.

ვერცერთ ფორმატს ვერ მაჩვენებთ, სადაც ჩვენ ამაზე არ ვსაუბრობდეთ და უფრო მეტიც, ჩვენი უმთავრესი გამოწვევა და ამის შესახებ ცალსახად განვაცხადეთ, არის ორი რამ - ტერიტორიული მთლიანობის აღდგენა და სიღარიბის დაძლევა. ამას ვსაუბრობ ყველა პლატფორმასა და ფორმატში“, - განაცხადა მიქანაძემ.

ცნობისთვის, მიხეილ ყაველაშვილი გაერო-ს გენერალური ასამბლეის მე-80 სესიაზე სიტყვით გამოვიდა. მან სიტყვით გამოსვლისას ოკუპაციასთან დაკავშირებით ისაუბრა. ასევე, ყაველაშვილმა სიტყვით გამოსვლისას საერთაშორისო საზოგადოებას საქართველოს სუვერენიტეტისა და ტერიტორიული მთლიანობის ურყევი მხარდაჭერისთვის მადლობა გადაუხადა.

„საქართველოს ტერიტორიების 20% ოკუპაციის ქვეშ რჩება, ჩვენ დიდი ენერგიითა და შემართებით ვაგრძელებთ განვითარებასა და წინსვლას. ჩვენ გვაკისრია მისია, რომ ჩვენმა შვილებმა უფრო ძლიერ, ღირსეულ საქართველოში და მშვიდობიან მსოფლიოში იცხოვრონ“ , - განაცხადა ყაველაშვილმა.