ღაზაში ომის დასრულების შესახებ დონალდ ტრამპის სამშვიდობო გეგმას მივესალმები, - ამის შესახებ ევროკომისიის პრეზიდენტმა, ურსულა ფონ დერ ლაიენმა განაცხადა.

„ღაზაში ომის დასასრულებლად დონალდ ტრამპის მზადყოფნას მივესალმები. მოვუწოდებ ყველა მხარეს, რომ ეს შესაძლებლობა გამოიყენონ. ევროკავშირი მზად არის თავისი წვლილი შეიტანოს“, - განაცხადა ურსულა ფონ დერ ლაიენმა.

მისი თქმით, საომარი მოქმედებები უნდა დასრულდეს, ღაზაში ჰუმანიტარული დახმარების მიწოდება უნდა მოხდეს და ყველა მძევალი უნდა გათავისუფლდეს.

„ორი სახელმწიფოს პრინციპით გადაწყვეტა ახლო აღმოსავლეთში ხანგრძლივი და სამართლიანი მშვიდობის მიღწევის ერთადერთ გზად რჩება, სადაც ისრაელელი და პალესტინელი ხალხი ერთმანეთის გვერდიგვერდ, მშვიდობიანად და უსაფრთხოდ, ძალადობისა და ტერორიზმისგან თავისუფალ გარემოში იცხოვრებს“, - წერს ევროკომისიის პრეზიდენტი X-ზე.

შეგახსენებთ, გუშინ თეთრმა სახლმა ღაზაში ომის დასასრულებლად აშშ-ის პრეზიდენტის, დონალდ ტრამპის „ყოვლისმომცველი გეგმა“ გამოაქვეყნა. გეგმა 20 პუნქტისგან შედგება. გეგმის თანახმად, „თუ ორივე მხარე დათანხმდება წინადადებას, ომი დაუყოვნებლივ დასრულდება“. შეთანხმების მიღწევის შემთხვევაში, „ჰამასი“ მძევლებს გაათავისუფლებს. გეგმის მიხედვით, ომის დასრულების შემდეგ ღაზას გარდამავალი, ტექნოკრატიული, აპოლიტიკური პალესტინის კომიტეტი უხელმძღვანელებს.

დონალდ ტრამპმა ისრაელის პრემიერ-მინისტრთან, ბენიამინ ნეთანიაჰუსთან ერთად გამართულ პრესკონფერენციაზე განაცხადა, რომ ისრაელი მის სამშვიდობო გეგმას დათანხმდა.