პროკურატურის მიერ წარდგენილი მტკიცებულებების საფუძველზე, სასამართლომ საქართველოს სახელმწიფო საზღვრის უკანონოდ გადაკვეთის და გადაკვეთაში დახმარების ფაქტზე ორ ბრალდებულს თავისუფლების აღკვეთა მიუსაჯა. ამის შესახებ ინფორმაციას პროკურატურა ავრცელებს.

საქმე ეხება გიორგი ბაჩიაშვილის საქმეს და მისთვის გაწეულ დახმარებას, რომლის დროსაც მეორე ბრალდებულმა ფულადი თანხის სანაცვლოდ, ბაჩიაშვილი ავტომობილში სპეციალურად მოწყობილი სამალავით, სახელმწიფო საზღვარზე სომხეთის მიმართულებით მალულად გადაიყვანა

“სასამართლო პროცესზე გამოკვლეული მტკიცებულებებით დადასტურდა, რომ ერთ-ერთმა ბრალდებულმა 2 მარტს, წინასწარ შემუშავებული გეგმის შესაბამისად და ფულადი თანხის სანაცვლოდ, ავტომობილში სპეციალურად მოწყობილი სამალავით, საქართველოს სახელმწიფო საზღვარზე სომხეთის მიმართულებით მალულად გადაიყვანა პირი, რომელსაც, როგორც ბრალდებულს, აკრძალული ჰქონდა ქვეყნის დატოვება.

ერთ პირს ბრალდება სისხლის სამართლის კოდექსის 25, 344-ე მუხლის პირველი ნაწილით (საქართველოს სახელმწიფო საზღვრის უკანონოდ გადაკვეთაში დახმარება), ხოლო მეორეს 344-ე მუხლის პირველი ნაწილით (საქართველოს სახელმწიფო საზღვრის უკანონოდ გადაკვეთა) წარედგინათ, რაც სასჯელის სახედ 3-იდან 5 წლამდე თავისუფლების აღკვეთას ითვალისწინებს.

თბილისის საქალაქო სასამართლომ ბრალდებულები სრულად ცნო დამნაშავედ წარდგენილ ბრალდებაში და სასჯელის სახედ და ზომად 4 წლით და 6 თვით თავისუფლების აღკვეთა განუსაზღვრა”, - ნათქვამია პროკურატურის ინფორმაციაში.