PACE-ს საპარლამენტო ასამბლეაში განსაკუთრებულად იგრძნობა „დიფ სთეითის" გავლენები - მათ მიღებულ რეზოლუციას არ აქვს იმ ფურცლის ფასიც კი, რომელზეც ეს რეზოლუცია დაიბეჭდება, - ამის შესახებ პარლამენტის იურიდიულ საკითხთა კომიტეტის თავმჯდომარემ, არჩილ გორდულაძემ ჟურნალისტებთან განაცხადა.

მისივე თქმით, ასეთი რეზოლუციები კომენტარსაც არ იმსახურებს.

„დიახაც, გასაგებია რომ „დიფ სთეითის" წარმომადგენლებს ქართველი ხალხი არ მოსწონთ მარტივი მიზეზიდან გამომდინარე - ქართველი ხალხი ბედავს და ირჩევს იმ ხელისუფლებას, რომელიც მხოლოდ და მხოლოდ ქართველი ხალხის დაკვეთებს ასრულებს და არა მათ დავალებებს და მათ შეკვეთილ მუსიკაზე არ ცეკვავს. ერთია პოლიტიკური განცხადებები, მეორეა რეალობა, რომელსაც ისევ თვითონ ევროსტრუქტურები თავიანთი შეფასებებით ადასტურებენ, რომ საქართველო არის გაცილებით უფრო წინ, ვიდრე, მათ შორის, ევროკავშირში გაწევრიანებული ქვეყნები“, - განაცხადა გორდულაძემ.

ცნობისთვის, ევროსაბჭოში ხვალ საქართველოს საკითხზე დებატები გაიმართება. ორგანიზაციის ვებ-გვერდზე გამოქვეყნებული ინფორმაციის თანახმად, საქართველოს საკითხებში ევროპის საბჭოს საპარლამენტო ასამბლეის (PACE) მონიტორინგის თანამომხსენებლები ედიტე ესტრელა (პორტუგალია-სოციალისტების, დემოკრატებისა და მწვანეთა ჯგუფი) და საბინა ჩუდიჩი (ბოსნია და ჰერცეგოვინა, ევროპის ლიბერალებისა და დემოკრატების ალიანსი) წარადგენენ რეზოლუციას : „დემოკრატიისა და კანონის უზენაესობის მხარდაჭერა საქართველოში“. რეზოლუციის პროექტის ტექსტში აღნიშნულია, რომ ასამბლეა ძალიან წუხს იმის გამო, რომ საქართველოს ხელისუფლება სისტემატურად უგულებელყოფს მის შეშფოთებას და რეკომენდაციებს საქართველოში დემოკრატიული კრიზისის შესახებ, რომლებსაც იზიარებს საერთაშორისო საზოგადოება. დოკუმენტში ასევე საუბარია საქართველოში დაგეგმილ ადგილობრივ არჩევნებთან დაკავშირებით.